Yoshlar ishlari agentligi Qashqadaryoda “ayollar daftari” va “yoshlar daftari”ga kiritilgan ayrim shaxslarga kredit berilgani yolg‘on bo‘lib chiqqaniga munosabat bildirdi

Qashqadaryoda “ayollar daftari” va “yoshlar daftari”ga kiritilgan ikki mingga yaqin fuqaroga kredit berilgani yolg‘on bo‘lib chiqqani haqida xabar berilgandi. Yoshlar ishlari agentligi “Daryo”da e’lon qilingan mazkur xabarning agentlikka daxldor qismiga munosabat bildirdi.

Agentlik axborot xizmati rahbari Nodir Abduqodirovning “Daryo”ga bergan ma’lumotida ta’kidlanishicha, mazkur holatlar haqiqatan ham yuzaga kelgan. Ammo vaziyatning yuzaga kelishida agentlik mas’ullari emas, joylardagi sektor rahbarlari hamda sektor kotiblarining aybi bor.

“Afsuski, hududlarda olib borilayotgan monitoring natijalari daftardan chiqarilgan yoshlar to‘g‘risidagi ma’lumotlar ayrim hollarda noto‘g‘ri kiritilgani va asossiz ‘yoshlar daftari’dan chiqarib yuborilish holatlari uchrayotganligini ko‘rsatmoqda. Tartibga ko‘ra, yordam ko‘rsatilgan yoshlar sektor rahbarlari va hokimlarning yoshlar masalalari bo‘yicha o‘rinbosarlari taklifiga ko‘ra Xalq deputatlari tuman yoki shahar kengashi qarorlari asosida ‘yoshlar daftari’dan chiqariladi hamda sektor kotiblari tomonidan bu haqdagi ma’lumotlar maxsus elektron platformada qayd etiladi”, — deydi agentlik axborot xizmati mas’uli.

Agentlik rasmiysiga ko‘ra, elektron platformada qayd etilgan ma’lumotlar agentlik hamda mas’ul idora vakillari tomonidan doimiy monitoring qilinadi.

Shuningdek, Yoshlar ishlari agentligi rasmiy munosabat so‘ngida OAV vakillarini hamkorlikka chorlab qolgan.

Avvalroq Dehqonobodda “ayollar daftari” va “yoshlar daftari”ga kiritilgan fuqarolarga 216 ta tikuv mashinasi berilgani, O‘zbekistonda “ayollar daftari” va “temir daftar”ga kirgan oilalarning farzandlari bepul operatsiya qilinishi, Shavkat Mirziyoyev “Yoshlar daftari” orqali o‘z ishini boshlagan Aziza Samig‘ovaga 3 xonali uy sovg‘a qilgani to‘g‘risida xabar berilgandi.