Yangi O‘zbekiston degan nom bugun dunyo hamjamiyati tomonidan O‘zbekistonga nisbatan juda katta hurmat va e’tirof sifatida jaranglamoqda. Bu haqda 10-iyun, payshanba kuni o‘tkazilgan “Ma’naviyat festivali” matbuot anjumanida Respublika ma’naviyat va ma’rifat markazi rahbari Minhojiddin Hojimatov fikr bildirdi, deya xabar bermoqda “Daryo” muxbiri Mirolim Isajonov.
Tadbir avvalida so‘zga chiqqan Respublika ma’naviyat va ma’rifat markazi rahbari bugungi islohotlar haqida gapirarkan, xususan, shunday dedi:
Foto: Respublika ma’naviyat va ma’rifat markazi axborot xizmati
“Bugun hammamiz bir yangi davrda yashayapmiz. Yangi O‘zbekiston degan atama bugun jahon hamjamiyati tomonidan O‘zbekistonga nisbatan juda katta hurmat, ehtirom, e’tirof sifatida jaranglayapti. Yangi O‘zbekiston degan bu atama O‘zbekistonga yarashib turibdi, buni doim g‘urur bilan aytaman. Chunki O‘zbekistonda muhtaram Prezidentimiz boshchiligida bo‘layotgan o‘zgarishlar, islohotlar, shiddatli jarayonlar, eng muhimi, jahon hamjamiyatida yangi bir ma’naviy mezon kirib keldiki, bu har qanday sohadagi islohot, yangilik bo‘lmasin, uning mohiyati o‘lchovida xalqning rizoligi turish kerak.
“Sen qilayotgan ishlaringdan xalq rozimi, xalqning turmushi, oilasi, hayoti yaxshilanyaptimi, yoshlarning iqtidorlarini yuzaga chiqarish uchun imkoniyatlar eshigi ochilyaptimi, ko‘zi yoshga to‘lgan, hayotda boquvchisini yo‘qotgan, hayotning kutilgan, kutilmagan qiyinchiliklariga duch kelgan insonlarga tayanch, suyanch, mador bo‘ladigan ishlar qilinyaptimi?”, degan so‘zlar bilan o‘lchanyapti.
Men kecha bir uchrashuvda aytdim, ayollar daftari, yoshlar daftari, temir daftar degan so‘zlar mana hayotimizga kirib keldi. Bularning hammasini umumlashtirib, nima deb atash mumkin, deyishsa, men ‘mehr daftari’, ‘odamiylik daftari’, ‘insoniylik daftari’, ‘oqibat daftari’, ‘sahovat daftari’ deb aytgim keladi. Festivalning asosiy maqsadi – mana shu islohotlarni bor ko‘lami bilan o‘zida namoyon etib, xalqimizga yetkazishdir”, — dedi Minhojiddin Hojimatov.
Ta’kidlanishicha, festival doirasida “Yangi O‘zbekiston – yangi renessans sari!”, “Ma’rifat ulashib”, “Maqom kechalari”, “Bir nuroniy – besh nafar yoshga murabbiy”, “Bir ziyoli – bir mahallaga ma’naviy homiy” kabi o‘nlab loyihalar o‘tkaziladi. Shuningdek, barcha tuman va shaharlarda “Mahmudxo‘ja Behbudiy”, “Ota uy”, “Elparvar”, “Is’hoqjon Ibrat”, “Issiq non” singari yigirmaga yaqin o‘zbek filmlari namoyish etiladi.
