Namangan viloyati IIB ijtimoiy tarmoqlarda tarqalgan onasi yo‘qolib qolgani sabab Prezident Shavkat Mirziyoyevga videomurojaat yo‘llagan fuqaro bilan bog‘liq holat yuzasidan ma’lumot berdi.
Videomurojaatdagi ayolning so‘zlariga ko‘ra, uning onasi yo‘qolganiga 4 oy bo‘lgan. Ayolning Qirg‘izistonga o‘tib ketgan bo‘lishi mumkinligi ham aytilgan. Shuningdek, u onasini topish maqsadida xorijga chiqish pasportini ololmayotganini ta’kidlab, IIB xodimlariga chora ko‘rishni so‘ragan.
Idora matbuot xizmatining ma’lum qilishicha, Uychi tumanida yashovchi fuqaro K.R. 12-iyul kuni tuman prokurori nomiga ariza bilan murojaat qilib, unda onasi S.R. qarzdor bo‘lib qolganidan siqilib, 4-iyul kuni yashash xonadonidan chiqib ketgani va bedarak yo‘qolganini ma’lum qilib, onasini qidirib topishda amaliy yordam berishlikni so‘ragan.
Olib borilgan surishtiruv ishlari natijasida bedarak yo‘qolgan S.R.ning yashash sharoiti va oiladagi muhit o‘rganilgan. Aniqlanishicha, oila S.R.ning turmush o‘rtog‘i N.R. va o‘g‘li K.R.ning kunlik ishlab topgan maoshidan hamda o‘zi tomonidan kiyim-kechak savdosidan tushgan daromadlar orqali kun kechiradi. Bedarak yo‘qolgan S.R. o‘zining nomiga 2020-yil noyabr oyida “Agrobank” Uychi tuman filialidan qoramolchilik uchun 29,7 million so‘m kredit mablag‘lari rasmiylashtirib, ushbu pullarni o‘zining ehtiyojiga ishlatib yuborgan.
U kredit mablag‘larini to‘lashga qiynalgani, savdo-sotiq ishlari ham yurishmaganidan oila a’zolari orasida noqulay holatga tushib qolgani, shuningdek, kelini va qizi o‘rtasidagi o‘zaro oilaviy kelishmovchiliklardan bezigani sabab biroz muddat o‘zi yolg‘iz yashamoqchi bo‘lib, noma’lum tomonga ketgani ma’lum bo‘lgan.
Bedarak yo‘qolgan S.R.ni topish maqsadida tezkor surishtiruv ishlarini olib borilganida ayol yashash xonadonidan 4-iyul kuni chiqib ketgan bo‘lsa-da, 8-iyul kuni soat taxminan 14:30-15:00 lar chamasida muqaddam o‘zi bilan birga Namangan shahar “Chorsu” bozorida kiyim-kechak savdosi bilan shug‘ullanib kelgan fuqaro uni ko‘rganini ma’lum qilgan. U oilaviy kelishmovchiliklar, bankdan olgan kredit mablag‘larini to‘lolmayotgani, savdo-sotiq ishlari yurishmayotganini bildirgan, ammo hozir nima ish qilayotgani va qaysi manzilda yashab yurganini aytmagan.
Ta’kidlanishicha, bedarak yo‘qolgan S.R.ni qidirib topish maqsadida Uychi tuman IIBning barcha shaxsiy tarkibi hamda tungi xizmatga jalb etilgan barcha xodimlar, viloyat IIB JQB va PPXvaJTSB xodimlari holat bo‘yicha xabardor qilinib, qidirib topish yuzasidan tegishli topshiriqlar berilgan.
S.R.ning rangli fotosuratlari barcha blok postlar, bozorlar, odamlar gavjum bo‘ladigan hududlar, avtomobil to‘xtash joylari, poyezd vokzallari, ijtimoiy tarmoqlarga joylashtirilib, aholini xabardor etib borilmoqda, istirohat bog‘lari, guzar va oshxonalarga fotosuratlari yopishtirish choralari ko‘rilmoqda.
“Shuningdek, S.R.ning oila-a’zolari, yaqin qarindoshlari, tanish do‘stlari, ish joylaridan va boshqa aloqalari bilan munosabati qanday bo‘lganiga oydinlik kiritish maqsadida surishtiruv ishlari olib borilmoqda. Hozirda ayolning bedarak yo‘qolganlik holati bo‘yicha xabarnomalari barcha shahar, tuman IIBlari hamda Namangan viloyati teleradiokompaniyasiga yuborish choralari ko‘rilib, qidirib topish yuzasidan qo‘shimcha tezkor-qidiruv surishtiruv ishlari davom ettirilmoqda”, — deyiladi xabarda.
Avvalroq Andijonda 18 yoshli yigit kanalga oqizib yuborilgani aytilayotgan xabar yuzasidan jinoyat ishi qo‘zg‘atilgani, Qashqadaryoda 9 yil avval bedarak yo‘qolgan fuqaro o‘ldirilib, dalaga ko‘mib ketilgani aniqlangani to‘g‘risida xabar berilgandi.
Izoh (0)