Ёшлар ишлари агентлиги Қашқадарёда «аёллар дафтари» ва «ёшлар дафтари»га киритилган айрим шахсларга кредит берилгани ёлғон бўлиб чиққанига муносабат билдирди

Қашқадарёда «аёллар дафтари» ва «ёшлар дафтари»га киритилган икки мингга яқин фуқарога кредит берилгани ёлғон бўлиб чиққани ҳақида хабар берилганди. Ёшлар ишлари агентлиги «Дарё»да эълон қилинган мазкур хабарнинг агентликка дахлдор қисмига муносабат билдирди.

Агентлик ахборот хизмати раҳбари Нодир Абдуқодировнинг «Дарё»га берган маълумотида таъкидланишича, мазкур ҳолатлар ҳақиқатан ҳам юзага келган. Аммо вазиятнинг юзага келишида агентлик масъуллари эмас, жойлардаги сектор раҳбарлари ҳамда сектор котибларининг айби бор.

«Афсуски, ҳудудларда олиб борилаётган мониторинг натижалари дафтардан чиқарилган ёшлар тўғрисидаги маълумотлар айрим ҳолларда нотўғри киритилгани ва асоссиз ‘ёшлар дафтари’дан чиқариб юборилиш ҳолатлари учраётганлигини кўрсатмоқда. Тартибга кўра, ёрдам кўрсатилган ёшлар сектор раҳбарлари ва ҳокимларнинг ёшлар масалалари бўйича ўринбосарлари таклифига кўра Халқ депутатлари туман ёки шаҳар кенгаши қарорлари асосида ‘ёшлар дафтари’дан чиқарилади ҳамда сектор котиблари томонидан бу ҳақдаги маълумотлар махсус электрон платформада қайд этилади», — дейди агентлик ахборот хизмати масъули.

Агентлик расмийсига кўра, электрон платформада қайд этилган маълумотлар агентлик ҳамда масъул идора вакиллари томонидан доимий мониторинг қилинади.

Шунингдек, Ёшлар ишлари агентлиги расмий муносабат сўнгида ОАВ вакилларини ҳамкорликка чорлаб қолган.

Аввалроқ Деҳқонободда «аёллар дафтари» ва «ёшлар дафтари»га киритилган фуқароларга 216 та тикув машинаси берилгани, Ўзбекистонда «аёллар дафтари» ва «темир дафтар»га кирган оилаларнинг фарзандлари бепул операция қилиниши, Шавкат Мирзиёев «Ёшлар дафтари» орқали ўз ишини бошлаган Азиза Самиғовага 3 хонали уй совға қилгани тўғрисида хабар берилганди.