Jizzaxda fuqaroning norasmiy diniy faoliyat bilan shug‘ullanishi hamda diniy ta’limotdan saboq berish bilan bog‘liq noqonuniy faoliyatga chek qo‘yildi, deb xabar beradi viloyat IIB axborot xizmati.
Ma’lum qilinishicha, Jizzax viloyati IIB hamda DXX xodimlari hamkorligida Jizzax shahri “Turon” MFYda yashovchi shaxsning xonadonida o‘tkazilgan tezkor tadbir davomida fuqaroning o‘z turar joyida norasmiy diniy faoliyat bilan shug‘ullanib, go‘yoki fuqarolarning ishlarini turli duolar bilan yaxshilash, odamlarni sehr-jodu qilish bilan shug‘ullanib kelgani aniqlangan.
Ushbu shaxsning xonadoni xolislar ishtirokida ko‘zdan kechirilganda 12 nafar fuqaro mijoz sifatida xonadonga kelib, navbat kutib turgani ma’lum bo‘lgan. Xonadon ichidan fuqarolarning ism-sharifi yozilgan 5 dona ish daftari topilgan. Bu daftarlarda “domla”ga kelganlarning yuzdan oshiq fotosurati hamda undan so‘ralgan niyatlar yozilgan. Ayrim fotosuratlar pichoq yordamida kesilgan.
Bundan tashqari, nashriyoti ko‘rsatilmagan diniy mazmundagi 5 ta kitob, bir dona ot qamchisi, 9 dona turli ko‘rinishdagi osh pichoqlari kabi narsalar borligi aniqlanib, xolislar ishtirokida hujjatlashtirib olingan. Shuningdek, u turli yoshdagi fuqarolarga vakolati bo‘lmasa-da, uyida diniy saboq bergan. Soxta domlaning shogirdlari orasida Forish tumanining Iloncha qishlog‘ida yashovchi maktab o‘quvchisi ham bo‘lgan.
Niyatlar yozilgan daftarlarda kimdir o‘zganing turmush o‘rtog‘i unga qarashini so‘ragan bo‘lsa, boshqasi hokimlikka, yana biri deputatlikka da’vo qilgan. Fuqarolardan biri esa qaynonasining “jim o‘tirishini” so‘ragan bo‘lsa, yana biri tergov uning foydasiga hal bo‘lishini bildirgan.
Holat yuzasidan Ma’muriy javobgarlik to‘g‘risidagi kodeksning 201-modda (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) 2-qismi hamda 241-moddasi (diniy ta’limotdan saboq berish tartibini buzish) bilan ma’muriy bayonnoma rasmiylashtirilgan. To‘plangan hujjatlar jinoyat ishlari bo‘yicha Jizzax sudida ko‘rib chiqilib, fuqaroga nisbatan 10 sutka ma’muriy qamoq jazosi tayinlangan.
Eslatib o‘tamiz, avvalroq Qashqadaryoda 13 nafar voyaga yetmagan bolaga noqonuniy diniy ta’lim berish bilan shug‘ullangan ona-bola aniqlangandi. Shuningdek, Toshkentda voyaga yetmaganlarga noqonuniy diniy ta’lim bergan yigit 15 sutkaga qamalgani va Toshkentda bolalarga noqonuniy diniy ta’lim bergan 42 yoshli erkak jarimaga tortilgani xabar qilingan.
Izoh (0)