Gruziyaga yengilgan O‘zbekiston terma jamoasi, Zidanni qo‘llab-quvvatlaydigan Ronaldu va Neymarni sotishni xohlayotgan “PSJ”. Eng so‘nggi sport yangiliklari

Dunyo va o‘zbek sportiga oid 15-noyabr kunining eng muhim xabarlari dayjesti bilan tanishing.

O‘zbekiston

Futbol bo‘yicha O‘zbekiston terma jamoasi o‘rtoqlik o‘yinida Gruziyaga mag‘lub bo‘ldi. Uchrashuv taqdirini hal qilib bergan yagona gol 40-daqiqada David Volkov tomonidan kiritildi.

Shu tariqa O‘zbekiston terma jamoasi Srechko Katanes boshchiligida ketma-ket 2-o‘yinda mag‘lubiyatga uchradi. Jamoa bungacha Iordaniyaga 0:3 hisobida mag‘lub bo‘lgandi.

“Nasaf” qoldirilgan tur o‘yinida “Qo‘qon-1912”ni yengdi

Futbol bo‘yicha O‘zbekiston Superligasining qoldirilgan 24-turidan o‘rin olgan o‘yinda “Nasaf” o‘z maydonida “Qo‘qon-1912”dan 3:1 hisobida ustun keldi.

“Nasaf” ushbu natijadan keyin 44 ochko bilan 3-o‘ringa ko‘tarilib oldi. “Qo‘qon-1912” esa 32 ochko bilan 8-pog‘onadan joy olgan.

O‘zbekiston sambo terma jamoasi JCh da 2-o‘rinni egalladi

Toshkent shahrida 12—14-noyabr kunlari sambo bo‘yicha Jahon chempionati o‘tkazildi.

Musobaqada ishtirok etgan o‘zbekistonlik sambochilar umumiy hisobda 11 ta medal qo‘lga kiritdi. Terma jamoa a’zolari 3 ta oltin, 5 ta kumush va 3 ta bronza medallariga ega chiqdi.

Quyidagi sportchilar musobaqada g‘olib va sovrindor bo‘ldi:

Oltin:

• -58 kg: Bahodir Bakiyev (jangovar sambo)
• -88 kg: Ixtiyor Eshmurodov
• -98 kg: Nodirjon Mirxalikov.

• -79 kg: Ulug‘bek Rahmonov
• -64 kg: Oybek Soliyev (jangovar sambo)
• -50 kg: Sabina Davlatova
• -79 kg: Furqat Ro‘ziyev (jangovar sambo)
• -88 kg: Sohibjon Hasanboyev (jangovar sambo).

• -59 kg: Ibodatxon Agojonova
• +98 kg: Hakimjon Ismoilov (jangovar sambo)
• -71 kg: Istam Qudratov.

Jahon

“Manchester Yunayted”da murabbiylar almashinuvi ro‘y berishi mumkin.

Ole-Gunnar Sulsher jamoaning so‘nggi paytlardagi qoniqarsiz natijalari sabab iste’foga chiqarilish ehtimoli mavjud. Uning o‘rniga asosiy nomzod sifatida “Real” sobiq bosh murabbiyi Zinedin Zidan ko‘rilmoqda.

Manchester Evening News xabariga ko‘ra, “Manchester Yunayted” hujumchisi Krishtianu Ronaldu agar Sulsher iste’foga chiqarilsa, Zidan variantini qo‘llab-quvvatlashini aytgan.

Dani Alves “Barselona”da eng kam maosh oladi

Dani Alves “Barselona”ga qaytish uchun kam maoshga rozi bo‘ldi, deb yozmoqda Diario Sport.

Qayd etilishicha, 38 yoshli futbolchiga belgilangan maosh jamoadagi eng past maosh hisoblanadi. Shu bilan birga, braziliyalikning shartnomasida bonus qismi ham ko‘zda tutilgan bo‘lib, u yutuqlar va qo‘lga kiritilgan sovrinlarga bog‘liq bo‘ladi.

Alves JCh—2022 boshlangunga qadar, ya’ni bir yil muddatga shartnoma imzolashni istagan edi, ammo mavsum oxirigacha mo‘ljallangan kelishuvga rozi bo‘ldi.

Klub matbuot xizmati braziliyalik himoyachi tibbiy ko‘rikdan muvaffaqiyatli o‘tgani va 15-noyabr kuni jamoa bilan ilk mashg‘ulotini o‘tkazganini e’lon qildi.

Morata — 7 yil ichida Ispaniya terma jamoasida eng ko‘p gol urgan futbolchi

Ispaniya terma jamoasi hujumchisi Alvaro Morata JCh—2022 saralashi doirasidagi Shvetsiyaga qarshi o‘yinda (1:0) yagona golga mualliflik qildi.

“Yuventus” hujumchisi uchun bu terma jamoa safidagi 23-gol bo‘ldi. Buning uchun unga 50 ta o‘yin kerak bo‘ldi.

Morata 2014-yilning noyabridan, ya’ni Ispaniya terma jamoasidagi debyutidan keyin boshqa hech qaysi futbolchi Ispaniya terma jamoasi safida buncha ko‘p gol ura olmagan. Agar so‘nggi 7 yildagi davr olinsa, Alvaro eng yaqin ta’qibchisidan 10 ta golga oldinda.

“PSJ” prezidenti Neymarni sotib yubormoqchi

“PSJ” hujumchisi Neymar 2021/2022-yilgi mavsum oxirida jamoani tark etishi mumkin, deb xabar beradi El Nacional.

Manbaning xabariga ko‘ra, Parij klubi prezidenti Nosir Al-Helayfi yozgi transferlar vaqtida Neymarni sotish haqida o‘ylamoqda. “PSJ” rahbari ushbu transferdan maksimal darajada ko‘proq mablag‘ olishni kutmoqda.

Al-Helayfi braziliyalikning ehtimoliy transferi yuzasidan Yevropaning bir qator klublari bilan bog‘langan. Bu klublar qatorida Angliya jamoalari va “Barselona” borligi aytilmoqda.