Mimar Group va Outdoor Factory o‘rtasida o‘zaro tajriba almashish va hamkorlik qilish to‘g‘risida memorandum imzolandi.
2021-yil 9-noyabr kuni Toshkent shahrida Mimar Group qurilish xoldingi va Turkiyaning Outdoor Factory kompaniyasi o‘zaro tajriba almashish va hamkorlik memorandumini imzoladi. Outdoor Factory kompaniyasining asosiy faoliyat turi — bog‘lar, muzeylar va madaniy obyektlarni loyihalashtirish va qurish.
Imzolash marosimida Mimar Group direktori Feruzbek Davronov, Outdoor Factory kompaniyasi boshqaruvi raisi Toygar Yedigoz hamda kompaniyalar xodimlari ishtirok etishdi.
Mimar Group direktori Feruzbek Davronov so‘zga chiqib, O‘zbekistonda qurilish sohasini rivojlantirish bo‘yicha katta salohiyat borligini, ushbu memorandum hamkorlikni yanada kengaytirishga tomonlarning intilishi ifodasi ekanini ta’kidladi.
“Butun dunyo bo‘ylab mustahkam loyihalarni amalga oshirib kelayotgan Outdoor Factory kompaniyasi bilan hamkorlik, shaharsozlik sohasini mutlaqo yangi bosqichga olib chiqishiga ishonamiz”, — dedi Feruzbek Davronov.
Outdoor Factory korxonasining boshqaruvi raisi Toygar Yedigoz o‘z navbatida Mimar Group bilan imzolangan memorandum ulkan loyihalarni amalga oshirishiga xizmat qilishini qayd etdi.
“Mimar Group korxonasi bilan hamkorlik bizning tajriba va imkoniyatlarimizni birlashtirgan holda O‘zbekiston arxitekturasini rivojlantirish va boyitishga imkon yaratadi. Biz birgalikda yangi loyihalarni amalga oshirgan holda davlatlarimiz munosabatlarini yanada mustahkamlaymiz”, — deb imzolangan memorandumni izohladi Toygar Yedigoz.
Memorandum doirasida Mimar Group va Outdoor Factory korxonasi bir necha yo‘nalishlarda, jumladan, bog‘lar, muzeylar va madaniy obyektlarni loyihalashtirish va qurish sohalarida hamkorlik qilishga kelishib oldilar.
Outdoor Factory korxonasi haqida
Outdoor Factory — 2010-yilda Istanbul shahrida tashkil etilgan Turkiyaning yirik qurilish va loyihalashtirish korxonasi. Kompaniyaning asosiy faoliyat turi — bog‘lar, muzeylar va madaniy obyektlarni loyihalashtirish va qurish. Outdoor Factory Turkiya, Qatar, Italiya, AQSh, Olmoniya va O‘zbekistonda o‘z vakolatxonalariga ega. Korxona dunyo miqyosida 350 dan ortiq konseptual loyihalar, shuningdek, 25 muzey va 110 monument loyihalarni amalga oshirdi.
Mimar Group haqida
Mimar Group O‘zbekistondagi eng yirik qurilish xoldinglaridan biri bo‘lib, sanoat parklari, ijtimoiy infratuzilma obyektlari, ta’lim muassasalari kabi yirik shaharsozlik loyihalarni amalga oshiradi.
Mimar Group o‘z rivojlanish strategiyasiga binoan, dunyodagi eng yirik va ilg‘or kompaniyalar bilan birga uzoq muddatli hamkorlik aloqalarni o‘rnatishga intiladi.
Reklama huquqi asosida.
Izoh (0)