Александр Рар исмли немис сиёсатшуноси «Ukraina.ru» нашрига берган интервьюсида Беларусь ва Польша чегарасида юзага келган миграция инқирозида учинчи жаҳон урушининг бошланиш хавфини кўраётганини маълум қилди. Унинг фикрича, вазиятнинг кескинлашуви охирини айтиб бўлмайдиган оқибатларга олиб келиши мумкин.
Экспертнинг таъкидлашича, Польша Беларусь билан чегарада девор қуриш режасини тасдиқлаган, Беларусь чегарачилари эса гувоҳларга кўра, қочоқларни чегарани кесиб ўтишга ундамоқда. Шунингдек, унинг қўшимча қилишича, ҳозирча польшалик чегарачилар мигрантларни қўрқитиш мақсадида ўқ узмоқда, аммо чегарани оммавий кесиб ўтишга уриниш бошланса, бу олдиндан айтиб бўлмайдиган оқибатларга олиб келиши мумкин. Рар вазият эртами-кеч назоратдан чиқиб кетиши мумкинлигини қайд этган.
«Борган сари кўпроқ жиддий тарихчилар, таҳлилчилар биз Европада Биринчи жаҳон урушининг бошланишини ёдга солган вазиятда яшаётганимиз ҳақида гапирмоқда. Ўшанда ҳеч ким урушни хоҳламаган эди ва уруш — бу улкан қурбонликларга олиб келадиган телбалик деб ҳисобланган, чунки барча — немислар ҳам, Россия, Франция ва Англия ҳам тиш-тирноғигача қуролланган эди», — дейди сиёсатшунос.
Бироқ Рар Австрия-Венгрия собиқ герцогига ўқ узилгани сабаб Германия Россия ва Францияга уруш очганини эслаб ўтган. Шундан келиб чиқиб, у мигрантлар билан боғлиқ юзага келган вазиятга жиддий ёндашишга чақирган.
Эслатиб ўтамиз, Беларусь ва Европа Иттифоқи мамлакатлари чегарасидаги миграцион инқироз Александр Лукашенконинг Минск энди Европани муҳожирлардан ҳимоя қилмоқчи эмаслигини айтганидан кейин бошланди. Шундан сўнг, оммавий ахборот воситаларида хабар берилишича, беларуслик чегарачилар чегарани ноқонуний кесиб ўтмоқчи бўлган одамларга жиддий тўсқинлик қилмаслик ҳақида яширин кўрсатма олган.
Изоҳ (0)