O‘zbekiston Prezidenti Shavkat Mirziyoyev Turkiy kengash sammitida ishtirok etish uchun Turkiyaga amalga oshirgan tashrifini yakunlab, Toshkentga qaytib keldi. Bu haqda davlat rahbarining matbuot xizmati xabar berdi.
Eslatib o‘tamiz, Shavkat Mirziyoyev 11-noyabr kuni Turkiy tilli davlatlar hamkorlik kengashi sammitida ishtirok etish uchun Istanbul shahriga tashrif buyurdi. U yerda davlat rahbari Turkiy tilli davlatlar hamkorlik kengashi bosh kotibi Bag‘dod Amreyevni qabul qildi.
Shuningdek, Prezident 12-noyabr kuni Istanbulda Qirg‘iziston prezidenti Sadir Japarov bilan har ikki davlat o‘rtasidagi kelishuvlarni amalga oshirish masalalarini muhokama qildi. Muloqotda Xitoy—Qirg‘iziston—O‘zbekiston temiryo‘lini qurish loyihasini jadal ilgari surishga alohida e’tibor qaratildi. Shu bilan birga, davlat rahbari Turkiya prezidenti Rajab Toyyib Erdo‘g‘on bilan mintaqa kun tartibidagi masalalar yuzasidan fikr almashdi.
Bundan tashqari, sammit doirasida Turkiy kengash kotibiyatining yangi binosi oldida bayroq ko‘tarish marosimi bo‘lib o‘tdi. Unda O‘zbekiston, Ozarbayjon, Turkiya, Qirg‘iziston, Qozog‘iston hamda Vengriya, Turkmaniston va tashkilotning bayroqlari ko‘tarildi.
Sammit doirasida O‘zbekistonda 2022-yilda Turkiy davlatlar sanoat haftaligi o‘tkazilishi hamda Turkiy davlatlar tashkilotining birinchi sammiti 2022-yilda O‘zbekistonda bo‘lib o‘tishi e’lon qilindi.
Sammitda savdo, investitsiya, “yashil” iqtisodiyot, raqamli texnologiyalar, transport, ta’lim va madaniyat sohalaridagi hamkorlikni rivojlantirish masalalari ko‘rib chiqilgan. Uning natijalari bo‘yicha 10 dan ortiq hujjat imzolangan.
Izoh (0)