O‘zbekistonning IT sohasidagi to‘rtta oliy ta’lim muassasasi talabalari sun’iy intellekt, 5G, bulutli hisoblash, IoT kabi ilg‘or texnologiyalar va yechimlarni o‘rganishga, shuningdek, yetakchilik sifatlarini rivojlantirish, Xitoy urf-odatlarini o‘rganish hamda tailandlik va belarusiyalik ishtirokchilar bilan madaniy almashinuvga yo‘naltirilgan “Huawei Seeds for the Future 2021” o‘quv dasturida ishtirok etishdi.
10-noyabr kuni Muhammad al-Xorazmiy nomidagi ixtisoslashtirilgan axborot-kommunikatsiya texnologiyalari maktabida IT sohasidagi oliy ta’lim muassasalari talabalariga 7-marta o‘zlarining AKT sohasidagi bilimlarini oshirish, xalqaro ekspertlarning ilg‘or texnologiyalar mavzusidagi ma’ruzalarini tinglash, boshqa mamlakatlardan kelgan ishtirokchilar bilan madaniy qadriyatlarni almashish, shuningdek, Xitoy madaniyati va urf-odatlari bilan tanishish imkoniyatini taqdim etgan “Seeds for the Future 2021” loyihasining yopilish marosimi bo‘lib o‘tdi. Tantanali marosim Muhammad al-Xorazmiy nomidagi AKT texnologiyalari maktabi o‘quvchilari uchun, shuningdek, IT sohasidagi oliy ta’lim muassasalarining robototexnikaga qiziquvchi barcha talabalari uchun mo‘ljallangan hakatonning o‘tkazilishi bilan yakunlandi.
“Huawei kompaniyasi O‘zbekistonda yosh AKT kadrlarini rivojlantirishni qo‘llab-quvvatlashga katta e’tibor qaratib kelmoqda. Bizning ‘Seeds for the Future’ loyihamiz nafaqat texnologiya sohasidagi innovatsiyalarni chuqur o‘rganish, balki o‘z salohiyatini kengaytirish, o‘zining yetakchilik sifatlarini namoyon etish, qiziqarli odamlar bilan tanishish va keyingi yutuqlar uchun ilhom manbalarini topish imkonini ham beradi. O‘zbekistonda ‘Seeds for the Future’ dasturi o‘ziga xos xususiyatlarga ega. Biz loyihada nafaqat oliy ta’lim muassasasi talabalarini birlashtiryapmiz, balki unda ishtirok etish uchun maktab o‘quvchilarini ham jalb qilmoqdamiz. Bugungi kunda dastur doirasida Muhammad al-Xorazmiy nomidagi AKT maktabi ishtirokida hakaton tadbiri, 59-sonli ixtisoslashtirilgan maktabda esa stipendiya tanlovi o‘tkazilmoqda. Biz 2021-yilgi loyiha ishtirokchilarini uning muvaffaqiyatli yakunlangani bilan tabriklaymiz va IT sohasidagi oliy ta’lim muassasalariga dasturdagi faol ishtiroki uchun minnatdorchilik bildiramiz”, — deya ta’kidladi O‘zbekistondagi Huawei kompaniyasining direktori Lyu Szyasin.
1—8-noyabr kunlari Toshkent axborot texnologiyalari universiteti, Amiti universiteti, Yeoju texnika instituti va Turin politexnika universitetining 25 nafar talabasi O‘zbekistondagi Huawei kompaniyasi ofisida gibrid formatda o‘qitildi. 2021-yilgi dastur Huawei kompaniyasining Xitoydagi bosh qarorgohi bilan jonli ulanishlar, Xitoyning “Kremniy vodiysi”dagi IT-kompaniyalari tajribasi bilan tanishish, texnologiya bo‘yicha oldindan yozib olingan kurslar, O‘zbekistondagi Huawei kompaniyasining ko‘rgazma zaliga sayohat, shuningdek, Shenchjen shahridagi ko‘rgazma zali bo‘ylab virtual sayohat, Huawei mobil servislarni (HMS) rivojlantirish va ilovalarni ishlab chiquvchilar uchun ochiq imkoniyatlar mavzusidagi taqdimotni o‘zida mujassamlashtirdi.
Kompaniya taklifiga binoan, Birlashgan millatlar tashkilotining Taraqqiyot dasturi talabalar uchun O‘zbekistonning barqaror rivojlanishi va bu jarayonda raqamli texnologiyalarning roli bo‘yicha ma’ruza tashkil qildi. Talabalar barqaror rivojlanish maqsadlariga erishish uchun raqamli texnologiyalarni joriy etishning muvaffaqiyatli misollari bilan tanishdilar, shuningdek, ma’ruzachilar Huawei “Yashil chempion” bo‘lgan #GreenAralSea loyihasi haqida ma’lumot berishdi. Green Uzbekistan tashabbusi doirasida Huawei kompaniyasi Orol dengizi tubiga 30 ming tup saksovul ko‘chati ekilishini ta’minladi.
O‘quv dasturi davomida talabalar o‘zlarining Tech4Good (Yaxshilik uchun texnologiyalar) loyihasini yaratish ustida ishlash uchun ikki guruhga bo‘lingan edilar. Mashg‘ulotlarning so‘nggi kunida ishtirokchilar sifatli ta’limni taqdim etish (BRM4) va munosib ish va iqtisodiy o‘sishni ( BRM8) ta’minlash bo‘yicha BMTning barqaror rivojlanish maqsadlariga erishishga yordam beradigan IT-texnologiyalari joriy etilgan loyihalarni taqdim etdilar.
Seeds for the Future — Huawei kompaniyasi tomonidan o‘z korporativ ijtimoiy majburiyatlarini bajarish doirasida amalga oshirilayotgan global dastur. O‘tgan yillar davomida dastur bo‘yicha O‘zbekistondan 50 nafar talaba Xitoydagi o‘quv kurslarida tahsil olib qaytdi. 2017-yilda Seeds for the Future loyihasining o‘zbekistonlik 4 nafar ishtirokchisi Pekinda bo‘lib o‘tgan “Bir kamar, bir yo‘l” xalqaro sammitida ishtirok etish uchun taklif etilgan edi. 2020-yilda pandemiya sababli loyiha onlayn tartibda o‘tkazildi.
Reklama huquqi asosida.
Izoh (0)