Ўзбекистоннинг IT соҳасидаги тўртта олий таълим муассасаси талабалари сунъий интеллект, 5G, булутли ҳисоблаш, IoT каби илғор технологиялар ва ечимларни ўрганишга, шунингдек, етакчилик сифатларини ривожлантириш, Хитой урф-одатларини ўрганиш ҳамда таиландлик ва беларусиялик иштирокчилар билан маданий алмашинувга йўналтирилган «Huawei Seeds for the Future 2021» ўқув дастурида иштирок этишди.
10 ноябрь куни Муҳаммад ал-Хоразмий номидаги ихтисослаштирилган ахборот-коммуникация технологиялари мактабида IT соҳасидаги олий таълим муассасалари талабаларига 7 марта ўзларининг АКТ соҳасидаги билимларини ошириш, халқаро экспертларнинг илғор технологиялар мавзусидаги маърузаларини тинглаш, бошқа мамлакатлардан келган иштирокчилар билан маданий қадриятларни алмашиш, шунингдек, Хитой маданияти ва урф-одатлари билан танишиш имкониятини тақдим этган «Seeds for the Future 2021» лойиҳасининг ёпилиш маросими бўлиб ўтди. Тантанали маросим Муҳаммад ал-Хоразмий номидаги АКТ технологиялари мактаби ўқувчилари учун, шунингдек, IT соҳасидаги олий таълим муассасаларининг робототехникага қизиқувчи барча талабалари учун мўлжалланган ҳакатоннинг ўтказилиши билан якунланди.
«Huawei компанияси Ўзбекистонда ёш АКТ кадрларини ривожлантиришни қўллаб-қувватлашга катта эътибор қаратиб келмоқда. Бизнинг ‘Seeds for the Future’ лойиҳамиз нафақат технология соҳасидаги инновацияларни чуқур ўрганиш, балки ўз салоҳиятини кенгайтириш, ўзининг етакчилик сифатларини намоён этиш, қизиқарли одамлар билан танишиш ва кейинги ютуқлар учун илҳом манбаларини топиш имконини ҳам беради. Ўзбекистонда ‘Seeds for the Future’ дастури ўзига хос хусусиятларга эга. Биз лойиҳада нафақат олий таълим муассасаси талабаларини бирлаштиряпмиз, балки унда иштирок этиш учун мактаб ўқувчиларини ҳам жалб қилмоқдамиз. Бугунги кунда дастур доирасида Муҳаммад ал-Хоразмий номидаги АКТ мактаби иштирокида ҳакатон тадбири, 59-сонли ихтисослаштирилган мактабда эса стипендия танлови ўтказилмоқда. Биз 2021 йилги лойиҳа иштирокчиларини унинг муваффақиятли якунлангани билан табриклаймиз ва IT соҳасидаги олий таълим муассасаларига дастурдаги фаол иштироки учун миннатдорчилик билдирамиз», — дея таъкидлади Ўзбекистондаги Huawei компаниясининг директори Лю Цзясин.
1—8 ноябрь кунлари Тошкент ахборот технологиялари университети, Амити университети, Yeoju техника институти ва Турин политехника университетининг 25 нафар талабаси Ўзбекистондаги Huawei компанияси офисида гибрид форматда ўқитилди. 2021 йилги дастур Huawei компаниясининг Хитойдаги бош қароргоҳи билан жонли уланишлар, Хитойнинг «Кремний водийси»даги IT-компаниялари тажрибаси билан танишиш, технология бўйича олдиндан ёзиб олинган курслар, Ўзбекистондаги Huawei компаниясининг кўргазма залига саёҳат, шунингдек, Шэньчжэнь шаҳридаги кўргазма зали бўйлаб виртуал саёҳат, Huawei мобил сервисларни (ҲМС) ривожлантириш ва иловаларни ишлаб чиқувчилар учун очиқ имкониятлар мавзусидаги тақдимотни ўзида мужассамлаштирди.
Компания таклифига биноан, Бирлашган миллатлар ташкилотининг Тараққиёт дастури талабалар учун Ўзбекистоннинг барқарор ривожланиши ва бу жараёнда рақамли технологияларнинг роли бўйича маъруза ташкил қилди. Талабалар барқарор ривожланиш мақсадларига эришиш учун рақамли технологияларни жорий этишнинг муваффақиятли мисоллари билан танишдилар, шунингдек, маърузачилар Huawei «Яшил чемпион» бўлган #GreenAralSea лойиҳаси ҳақида маълумот беришди. Green Uzbekistan ташаббуси доирасида Huawei компанияси Орол денгизи тубига 30 минг туп саксовул кўчати экилишини таъминлади.
Ўқув дастури давомида талабалар ўзларининг Tech4Good (Яхшилик учун технологиялар) лойиҳасини яратиш устида ишлаш учун икки гуруҳга бўлинган эдилар. Машғулотларнинг сўнгги кунида иштирокчилар сифатли таълимни тақдим этиш (БРМ4) ва муносиб иш ва иқтисодий ўсишни ( БРМ8) таъминлаш бўйича БМТнинг барқарор ривожланиш мақсадларига эришишга ёрдам берадиган IT-технологиялари жорий этилган лойиҳаларни тақдим этдилар.
Seeds for the Future — Huawei компанияси томонидан ўз корпоратив ижтимоий мажбуриятларини бажариш доирасида амалга оширилаётган глобал дастур. Ўтган йиллар давомида дастур бўйича Ўзбекистондан 50 нафар талаба Хитойдаги ўқув курсларида таҳсил олиб қайтди. 2017 йилда Seeds for the Future лойиҳасининг ўзбекистонлик 4 нафар иштирокчиси Пекинда бўлиб ўтган «Бир камар, бир йўл» халқаро саммитида иштирок этиш учун таклиф этилган эди. 2020 йилда пандемия сабабли лойиҳа онлайн тартибда ўтказилди.
Реклама ҳуқуқи асосида.
Изоҳ (0)