Гурбангули Бердимуҳамедов ўғлига бюджет даромадларини кўпайтиришни буюрди, молия вазирига эса ҳайфсан берди

Туркманистон Вазирлар Маҳкамасининг 5 ноябрь куни бўлиб ўтган йиғилишида бош вазирнинг иқтисодиёт, банк ва халқаро молия ташкилотлари масалалари бўйича ўринбосари, мамлакат президенти Гурбангули Бердимуҳамедовнинг ўғли Сердар Бердимуҳамедов 10 ойлик фаолияти якунлари бўйича ижобий ҳисобот тақдим этди. Бу ҳақда «Хроника Туркменистана» хабар қилди.

Бош вазир ўринбосарининг ҳисоботига кўра, 2021 йил январь—октябрь ойларида ялпи ички маҳсулотнинг ўсиши 6,2 фоизни ташкил этган, ишлаб чиқариш ва товар айирбошлаш, жумладан, ташқи савдо ҳажми ошган. Шунингдек, давлат раҳбарининг ўғли Туркманистон мустақиллигининг 30 йиллиги муносабати билан очилиши режалаштирилган объектлар қурилиши ҳақида маълумот берган.

Ўз навбатида Гурбангули Бердимуҳамедов бош вазир ўринбосарига миллий иқтисодиёт ҳолатини мониторинг қилиш, мамлакат иқтисодий ривожланишининг кутилаётган кўрсаткичлари бўйича прогноз қилиш, қурилиш ва нефть-газ мажмуалари ишчилари билан учрашув ўтказиш юзасидан топшириқлар берган.

Бундан ташқари Туркманистон давлат раҳбари бюджет даромадларини ошириш, қабул қилинган дастурларни молиялаштиришнинг қўшимча манбаларини излаш, сармояларни жалб қилиш ҳамда давлат харажатлари ҳажми ва самарадорлигини назорат қилиш чораларини кўриш бўйича вазифаларни белгилаб олишни буюрган.

Сердар Бердимуҳамедовга барча бош вазир ўринбосарлари билан биргаликда ишончли сармояларга асосланиши керак бўлган 2022 йилга мўлжалланган мамлакат иқтисодиётини ривожлантириш дастурини тайёрлаш топширилган.

«Ҳар бир вазирлик ва тармоқ идорасининг 2022 йилга мўлжалланган аниқ иш режаси бўлиши керак», — деган катта Бердимуҳамедов.

Йиғилиш якунида Туркманистон президенти томонидан молия ва иқтисодиёт вазири Муҳаммадгелди Сердаровга ўз хизмат вазифаларини лозим даражада бажармагани ва фаолиятида йўл қўйган камчиликлари учун ҳайфсан берилган. Сердар Бердимуҳамедов устидан ҳеч қандай шикоят бўлмаган.

Сентябрь ойида давлат раҳбари Сердар Бердимуҳамедов ва Муҳаммадгелди Сердаров билан учрашиб, уларга 2022 йилги давлат бюджети лойиҳасини тайёрлаш бўйича топшириқ берганди. Унда импорт ўрнини босувчи товарлар ҳажмини ошириш, электрон маҳсулотлар ишлаб чиқарувчи корхоналар ташкил этиш ва уларни хусусийлаштириш каби вазифалар топширилган.

Сердаров сўнгги марта огоҳлантириш танбеҳини февраль ойида ҳукуматнинг 2020 йилдаги фаолияти якунларига бағишланган йиғилишида олган эди. Президент кредит қарзларининг ўсиши, валюта билан боғлиқ муаммолар ва Иқтисодиёт вазирлигининг ҳаракатсизлигидан ғазабланган ва ўғлига барча камчиликларни тузатиш учун ярим йиллик охиригача муҳлат берган. Агар кутилган натижага эришилмаса, уни ишдан бўшатишини айтган.

4 ноябрь куни Туркманистон президенти Гурбангули Бердимуҳамедов савдо мажмуасини ривожлантириш бўйича ишчи йиғилиш ўтказгани ва унда амалдорларга қиш мавсумида нархларнинг ошишига йўл қўймасликни буюргани хабар қилинганди.