Farg‘onadagi mahalla quturish kasalligi bo‘yicha xavfli hudud deb e’lon qilindi

Farg‘ona viloyati Oltiariq tumanidagi “Azimobod” mahallasini quturish kasalligi bo‘yicha nosog‘lom punkt deb e’lon qilish va cheklov qo‘yish haqida tuman hokimining qarori qabul qilindi.

Unda aytilishicha, MFYning xavfli hudud deb e’lon qilinishiga “Azimobod” mahallasi hududida bir bosh sigirda quturish kasalligini qo‘zg‘atuvchi babbesh–negri tanachalari aniqlangani sabab bo‘lgan. Tuman veterinariya va chorvachilikni rivojlantirish bo‘limiga hududda quturish kasalligiga moyil bo‘lgan barcha hayvonlarni klinik ko‘rikdan o‘tkazish, dezinfeksiyalovchi vositalar va dezinfeksiya ishlari o‘tkazilishini nazorat qilish vazifasi topshirilgan.

Bundan tashqari, Oltiariq tuman ichki ishlar bo‘limiga quturish kasalligi qayd etilgan mahalla hududida quturish kasalligining oldini olish maqsadida daydi, qarovsiz it va mushuklarni tutishda Obodonlashtirish boshqarmasi xodimlariga yordam berish vazifasi yuklatilgan.

Shuningdek, tuman sanitariya-epidemiologik osoyishtalik va jamoat salomatligi bo‘limiga quturish kasali bilan kasallangan chorva mollari haqida ma’lumotga ega shaxslar va shu kasallikni yuqtirganlarni aniqlash, ularga tez tibbiy yordam ko‘rsatishni yo‘lga qo‘yish ishlarini tashkil etish vazifasi topshirilgan.

Eslatib o‘tamiz, shu yilning sentabr oyida Toshkent shahrida bolalar o‘rtasida yuqori nafas yo‘llari yallig‘lanishi bilan bog‘liq noma’lum yuqumli kasallik tarqalayotgani, tez yordam xizmatiga bolalarda isitma ko‘tarilishi bilan bog‘liq chaqiruvlar soni keskin ortgani, bu qanday kasallik ekanini aniqlash hamda poytaxt umumta’lim maktablari va bolalar maktabgacha ta’lim muassasalarini 10 kun muddatga karantinga yopish lozimligi to‘g‘risida xabarlar tarqalgandi. Sog‘liqni saqlash vaziriligi ushbu mish-mishlar yuzasidan izoh bergan va hech qanday noma’lum yuqumli kasallik tarqalmagani haqida ma’lumot bergan.