Фарғонадаги маҳалла қутуриш касаллиги бўйича хавфли ҳудуд деб эълон қилинди

Фарғона вилояти Олтиариқ туманидаги «Азимобод» маҳалласини қутуриш касаллиги бўйича носоғлом пункт деб эълон қилиш ва чеклов қўйиш ҳақида туман ҳокимининг қарори қабул қилинди.

Унда айтилишича, МФЙнинг хавфли ҳудуд деб эълон қилинишига «Азимобод» маҳалласи ҳудудида бир бош сигирда қутуриш касаллигини қўзғатувчи баббеш–негри таначалари аниқлангани сабаб бўлган. Туман ветеринария ва чорвачиликни ривожлантириш бўлимига ҳудудда қутуриш касаллигига мойил бўлган барча ҳайвонларни клиник кўрикдан ўтказиш, дезинфекцияловчи воситалар ва дезинфекция ишлари ўтказилишини назорат қилиш вазифаси топширилган.

Бундан ташқари, Олтиариқ туман ички ишлар бўлимига қутуриш касаллиги қайд этилган маҳалла ҳудудида қутуриш касаллигининг олдини олиш мақсадида дайди, қаровсиз ит ва мушукларни тутишда Ободонлаштириш бошқармаси ходимларига ёрдам бериш вазифаси юклатилган.

Шунингдек, туман санитария-эпидемиологик осойишталик ва жамоат саломатлиги бўлимига қутуриш касали билан касалланган чорва моллари ҳақида маълумотга эга шахслар ва шу касалликни юқтирганларни аниқлаш, уларга тез тиббий ёрдам кўрсатишни йўлга қўйиш ишларини ташкил этиш вазифаси топширилган.

Эслатиб ўтамиз, шу йилнинг сентябрь ойида Тошкент шаҳрида болалар ўртасида юқори нафас йўллари яллиғланиши билан боғлиқ номаълум юқумли касаллик тарқалаётгани, тез ёрдам хизматига болаларда иситма кўтарилиши билан боғлиқ чақирувлар сони кескин ортгани, бу қандай касаллик эканини аниқлаш ҳамда пойтахт умумтаълим мактаблари ва болалар мактабгача таълим муассасаларини 10 кун муддатга карантинга ёпиш лозимлиги тўғрисида хабарлар тарқалганди. Соғлиқни сақлаш вазирилиги ушбу миш-мишлар юзасидан изоҳ берган ва ҳеч қандай номаълум юқумли касаллик тарқалмагани ҳақида маълумот берган.