“O‘zgidromet”: Havodagi chang miqdori me’yordan 5 barobarga oshgan

O‘zbekistonning bir qator hududlarida 4-noyabr, kunning ikkinchi yarmida chang bo‘roni kuzatildi. “O‘zgidromet”ning ma’lum qilishicha, buning oqibatida havodagi chang miqdori belgilangan me’yordan 5 barobarga oshgan.

Qayd etilishicha, Uraldan kelayotgan sovuq front zonasida shamolning sekundiga 12–15 metrgacha, Buxoro, Navoiy va Jizzax viloyatlarining ayrim joylarida esa sekundiga 20–25 metrgacha kuchayishi kuzatilgan.

Shamol kuchayishi oqibatida tuproqning juda quruq ustki qatlami ko‘tarilgan va respublikaning qator tumanlarida ko‘ruvchanlik 500–1000 metrgacha pasayib, chang-qumli g‘ubor holatini keltirib chiqargan.

“Hozirda shamol tezligi 5–10 metrgacha bo‘lib turibdi va bu 24:00 ga qadar davom etishi mumkin”, — deyiladi xabarda.