Toshkentda issiqlik elektr markazida investitsiya loyihasini amalga oshirish bo‘yicha Turkiyaning Çalik Enerji kompaniyasi bilan shartnoma imzolandi, deya xabar qilmoqda “Issiqlik elektr stansiyalari” matbuot xizmati.
Ma’lum qilinishicha, 2024-yilga qadar markazda har birining quvvati 32 megavatt bo‘lgan ikkita gaz turbina qurilmasi bunyod etiladi va loyihaning bosh pudratchisi sifatida Turkiyaning Çalik Enerji kompaniyasi ishtirok etadi.
“O‘ylaymanki loyihani yuqori uyushqoqlik bilan tashkil qilamiz va mamlakat energotizimini rivojlantirishga hissa qo‘shamiz”, – dedi loyiha menejeri Zahid Arichi.
Loyihaning umumiy qiymati – 109, 243 million dollar, shundan:
- Yaponiyaning xalqaro hamkorlik agentligi (JICA) mablag‘lari – 81,06 million dollar;
- Korxonaning o‘z mablag‘lari – 15,46 million dollar;
- O‘zbekistonning qo‘shgan ulushi – 12,71 million dollarni tashkil qiladi.
Bundan avval O‘zbekiston aholisi issiqlik energiyasidan 2,1 trln so‘m qarzdorligi ma’lum qilingani, O‘zbekistonda issiqlik tarmoqlarining 60 foizi ta’mirtalab ahvolda ekani hamda Toshkent shahrining issiqlik ta’minoti boshqaruvi 30 yilga Fransiyaning Veolia kompaniyasiga berilgani haqida xabar berilgandi.
Izoh (0)