Toshkent shahridagi chang–qum aralash tuman tufayli nafas olishda muammolar yuzaga kelgan poytaxt aholisi tibbiyot muassasalariga murojaat qilmoqda, deb xabar berdi Respublika ixtisoslashtirilgan ilmiy-allergiya markazi va 1-shahar klinik shifoxonasiga tayanib, “Gazeta.uz”.
Nashrga 1-shahar kasalxonasining xabar berishicha, soat 22:45 da shifoxonaga Yunusobod va Shayxontohur tumanlaridan ikki nafar erkak nafas olishdagi muammo tufayli murojaat qilgan. Hamshiraning so‘zlariga ko‘ra, bemorlardan birida shamollashdan keyin quruq yo‘tal bo‘lgan, yo‘tal havodagi chang miqdorining ortishi bilan kuchaygan.
“Ma’lum bo‘lishicha, erkakning xonadonidagi deraza va eshiklar ochiq qolgan, buning natijasida karavot va boshqa mebellar ustida chang to‘planib qolgan. Bemor karavotga yotsa bo‘g‘ila boshlagan”, — deyiladi shifoxona xabarida.
Mavzuga doir: Toshkentni qoplagan chang bo‘roni — suratlarda
Shifokor allergiya va nafas olishda muammolar kuzatilganda uydan chiqmaslikni, derazalarni yopishni va bino ichidagi yashash xonalarida namlikni oshirishni maslahat berdi.
Eslatib o‘tamiz 4-noyabr kuni tuproqning quruq ustki qatlamlarini shamol ko‘targani tufayli Toshkent shahri va boshqa viloyatlarda chang–qum aralash tuman yuzaga keldi. Poytaxt havosidagi chang miqdori me’yordan 5 barobar oshib ketdi. Shu bilan birga, havo harorati noldan pastga tushdi.
Izoh (0)