Toshkentda yozuvchi Nazir Safarovning uy devoridan 19 million so‘mlik barelyefini o‘g‘irlab ketganlikda gumonlangan ikki shaxs qo‘lga olindi, deb xabar beradi poytaxt IIBB matbuot xizmati.
Shayxontohur tumani IIO FMB xabariga ko‘ra, o‘g‘irlik 30-sentabr kuni soat 16:00 atrofida 25 yoshli Diyor S. va 23 yoshli Boburjon N. tomonidan sodir etilgan.
Holat yuzasidan Jinoyat kodeksining 169-moddasi 2-qismi (o‘g‘irlik) bilan jinoyat ishi qo‘zg‘atilgan. Tergov davom etmoqda.
Ma’lumot uchun, Nazir Safarov 1905-yili Jizzax shahrida, temirchi oilasida tug‘ilgan. 1955-yilda dramaturgiya sohasidagi katta xizmatlari uchun “O‘zbekistonda xizmat ko‘rsatgan san’at arbobi” unvoni berilgan, 1968-yilda esa Hamza nomidagi Respublika Davlat mukofoti laureati bo‘lgan. U 1975-yilda 70 yoshga to‘lishi munosabati bilan “O‘zbekiston xalq yozuvchisi” unvoniga muyassar bo‘lgan.
Barelyef fransuzcha bas-relief (“past relyef”) bo‘lib, bo‘rtma tasvir, haykaltaroshlikda relyef turi hisoblanadi. Zamin (fon) sathidan bo‘rttirib ishlangan tasvir asli shaklining yarmidan ortmasa barelyef deb ataladi.
Izoh (0)