Озарбайжон Вазирлар Маҳкамаси ҳузуридаги Тезкор штаб қарори билан ушбу мамлакатдаги махсус карантин режими 2022 йил 1 январга қадар узайтирилди. Бу ҳақда Ўзбекистоннинг Боку шаҳридаги элчихонасига таяниб, ТИВ матбуот хизмати хабар берди.
Амалдаги қоидаларга кўра, ҳозирги вақтда Ўзбекистон фуқаролари Озарбайжон ҳудудига кириши учун паспорт туридан (хорижий, дипломатик) қатъи назар, ўзлари билан бирга қуйидагиларни олишлари керак:
- Озарбайжон Вазирлар Маҳкамаси ҳузуридаги тезкор штабнинг махсус рухсатномаси. Ушбу рухсатномани расмийлаштириш тўғрисидаги сўров белгиланган тартибда қабул қилувчи томон тарафидан олдиндан, яъни Озарбайжонга жўнаб кетишдан 14 иш кунидан кам бўлмаган муддатда Тезкор штабга жўнатилиши зарур. Шу билан бирга, аризанинг мавжудлиги рухсат олишни кафолатламайди ҳамда рухсатноманинг берилиши – Озарбайжонга кириб келаётган Ўзбекистон фуқароси тўғрисидаги маълумотларнинг Давлат чегара хизматининг тегишли рўйхатларга ўз вақтида киритилишни таъминланмаслиги мумкин;
- Озарбайжонга жўнашдан олдин сўнгги 72 соат мобайнида олинган COVID-19 аниқлаш учун ПЗР-тестиниг салбий жавоби тўғрисидаги тиббий маълумотнома. Чегарадаги бўлиши мумкун бўлган ортиқча текширувлардан ва аэропортда расмиятчиликлардан айланиб ўтиш имконини берувчи QR-код бўлиши маъқул (QR-коди мавжуд бўлмаган маълумотномалар эгалари Боку шаҳрининг аэропортида батафсил текширувдан ўтади);
- COVID-19 паспортларининг турларидан бири: «COVID-19 га қарши вакцинациядан ўтганлик тўғрисидаги гувоҳнома» (фуқаро коронавирус инфекциясига қарши вакцинанинг камида икки дозасини олгандан кейин Ўзбекистоннинг ваколатли тиббиёт органи томонидан бериладиган ҳужжат) ёки «COVID-19 иммунитети гувоҳномаси» (фуқарода коронавирус инфекцияси билан касалланганлиги ва унинг қонида антитаналар мавжудлиги тўғрисида Ўзбекистоннинг ваколатли тиббиёт органи томонидан бериладиган ҳужжат. Ушбу ҳужжат Озарбайжонга киришдан камида 6 ой олдин берилган бўлиши керак).
Аввалроқ Германия ва Греция коронавирусга қарши эмланмаганлар учун чекловларни кучайтиргани, Ўзбекистоннинг Ҳиндистондаги элчихонасида сайёҳлик визаси бериш қайта тиклангани тўғрисида хабар берилганди.
Изоҳ (0)