Белграддаги яна бир омадсиз кун, номаълум муддатга сафдан чиққан Месси ва кетма-кет 2 марта тенгсиз деб топилган Роналду. Энг сўнгги спорт янгиликлари

Дунё ва ўзбек спортига оид 2 ноябрь кунининг энг муҳим хабарлари дайжести билан танишинг.

Ўзбекистон

Ўзбекистон U-21 терма жамоаси U-23 Осиё Кубоги—2022 саралаш босқичининг сўнгги ўйинида Кувайт U-23 ни 5:1 ҳисобида мағлубиятга учратди ва гуруҳда биринчи ўринни эгаллади.

Эслатиб ўтамиз, Осиё Кубоги—2022 мусобақаси Ўзбекистонда бўлиб ўтади. Шу сабаб Темур Кападзе жамоасининг ушбу саралаш босқичидаги натижаси Ўзбекистоннинг Осиё Кубогидаги иштирокига таъсир қилмайди.

Жаҳон чемпионати билан хайрлашган ўзбекистонлик боксчилар сони 10 нафарга етди

Сербиянинг Белград шаҳрида бокс бўйича Жаҳон чемпионатининг 2 ноябрь кунги баҳслари ўтказилмоқда.

Нодиржон Мирзаҳмедов қозоғистонлик Темиртас Жуссуповга енгилиб, мусобақа билан хайрлашди. Саиджамшид эса Жаъфаров таиландлик рақибига имкониятни бой бериб, ЖЧни тарк этди. Шунингдек, Ўзбекистон терма жамоасининг мусобақадаги байроқдори Лазизжон Муллажонов ҳам мундиалдаги иштирокини якунлади, у арманистонлик рақибига енгилди.

Шу тариқа ЖЧ—2021 ни тарк этган ўзбекистонлик боксчилар сони 10 нафарга етди. Ҳозирда фақат ярим финалга йўл олган Абдумалик Ҳалоковда медални қўл киритиш имконияти бор.

2 ноябрь куни яна икки нафар ўзбекистонлик боксчи ўз жангини ўтказади.

• -63,5 кг: Мужибилло Турсунов — Энди Круз (Куба) – 22:55 дан кейин;
• -92 кг: Мадиёр Саидраҳимов — Льюис Уильямс (Англия) – 00:40 дан сўнг.

Жаҳон

Антонио Конте расман «Тоттенҳэм»нинг янги бош мураббийи этиб тайинланди.

Лондон клуби италиялик мутахассис билан 2023 йилга қадар мўлжалланган шартнома имзолаган. Шунингдек, шартномада келишувни узайтириш шарти ҳам кўзда тутилган.

Конте ушбу лавозимда Нуну Эшпириту Сантунинг ўрнини эгаллайди. Аввалроқ Контенинг «Тоттенҳэм»даги йиллик маоши йилига 18,3 миллион еврони ташкил қилиши ҳақида хабар берилганди.

Месси номаълум муддатга сафдан чиқди

«ПСЖ» ҳужумчиси Лионель Месси тиззасидан олган жароҳати туфайли номаълум муддатга сафдан чиқди.

Infobae хабарига кўра, аргентиналик футболчи Париж клубининг бўлажак бир нечта ўйинларини ўтказиб юборади. У ушбу жароҳатини сентябрь ойида, Аргентина терма жамоаси сафида Венесуэлага қарши ўйинда (3:1) олган.

Мессини ўшандан кейин оғриқлар безовта қилиб келган. Тикланиш бироз вақт талаб қилиши мумкин. 34 ёшли футболчи Мадриддаги клиникалардан бирида реабилитация курсини ўтишни режалаштирган.

Шунингдек, Месси 3 ноябрь куни Чемпионлар Лигаси доирасида бўлиб ўтадиган «Лейпциг»га қарши ўйинда ҳам жамоасига ёрдам бера олмайди.

Агуэро юрагидаги муаммо сабаб камида 3 ой давомида майдонга туша олмайди

«Барселона» ҳужумчи Серхио Агуэронинг соғлиғи борасида баёнот берди.

Каталония клуби матбуот хизмати хабарига кўра, аргентиналик футболчи юраги билан боғлиқ муаммолардан сўнг камида 3 ой давомида майдонга туша олмайди.

Таъкидланишича, Агуэро тиббий кўрикдан ўтган, даволаш методикалари тикланиш темпига қараб олиб борилади.

33 ёшли ҳужумчи Ла Лига 12-тури доирасидаги «Алавес»га қарши ўйиннинг (1:1) 41-дақиқасида кўкрак қафасидаги оғриқ ва енгил тахикардия туфайли майдонни эрта тарк этганди. Унинг бир неча кун давомида шифохонада шифокорлар назоратида бўлгани таъкидланмоқда.

«Реал» Винисиус Жуниорнинг маошини 10 миллион еврога оширмоқчи

«Реал» ярим ҳимоячи Винисиус Жуниор билан янги шартнома имзоламоқчи.

Marca нашрига кўра, мадридликлар бразилиялик футболчи билан 2024 йилга қадар мўлжалланган шартномани узайтириш ниятида. Ўз навбатида янги шартномага кўра футболчининг маоши ҳам сезиларли даражада оширилади.

Айни дамда Винисиус жамоанинг энг кам маош оладиган футболчиларидан бири саналади. Унинг маоши солиқларгача йилига 3,5 млн еврони ташкил қилади. Янги шартномадан кейин эса ҳужумкор ярим ҳимоячининг йиллик маоши 10 миллион еврога кўтарилиши айтилмоқда.

Роналду кетма-кет иккинчи марта «Манчестер Юнайтед»да ой футболчиси бўлди

«Манчестер Юнайтед» ҳужумчиси Криштиану Роналду жамоанинг октябрь ойидаги энг яхши футболчиси деб топилди.

36 ёшли ҳужумчи мухлисларнинг 57% овозини қўлга киритди. Иккинчи ўринни дарвозабон Давид Де Хеа, учинчи ўринни эса ҳужумчи Маркус Рэшфорд эгаллаган.

Роналду октябрь ойида «Манчестер Юнайтед» таркибида бешта ўйинда майдонга тушиб, иккита гол урди ва битта голли узатмани амалга оширди. Қайд этиш лозим, Криштиану сентбар ойида ҳам мазкур совринни қўлга киритганди.

Блаттер ва Платини 2 миллион долларни ўзлаштирганликда айбланмоқда

Швейцария Бош прокуратураси ФИФА собиқ президенти Йозеф Блаттер ва УЕФА собиқ президенти Мишел Платинини фирибгарликда айбламоқда.

«Бош прокуратура Йозеф Блаттерни фирибгарлик, пул маблағларини ўзлаштириш ва ҳужжатларни қалбакилаштиришда айблайди.

Мишел Платини фирибгарликда, шунингдек, маблағларни ўзлаштириш ва ҳужжатларни қалбакилаштиришда иштирок этганликда гумонланмоқда», — дейилади хабарда.

Хабар қилинишича, собиқ футбол амалдорлари 2 миллион Швейцария франкини (2,19 миллион доллар) ўзлаштиришда айбланмоқда.