Toshkentda MDH, Boltiqbo‘yi va Gruziya Milliy Olimpiya qo‘mitalari rahbarlari ishtirokida mintaqaviy forum o‘z ishini boshladi.
Tadbirda O‘zbekiston nomidan Prezident maslahatchisi Abdujabbor Abduvohidov, Bosh vazir o‘rinbosari, Turizm va sport vaziri Aziz Abduhakimov, Osiyo Olimpiya kengashi vitse-prezidenti Otabek Umarov va Rustam Shoabdurahmonov boshchiligidagi O‘zbekiston MOQ rahbariyati, shuningdek, federatsiya va assotsiatsiyalar mutasaddilari ishtirok etdi.
Forumning ochilish qismida Otabek Umarov o‘z fikrlari bilan o‘rtoqlashdi.
Bugungi kunda Sobiq Ittifoq hududidagi barcha mamlakatlarni birlashtiruvchi platformalar unchalik ko‘p emas. Ular orasida o‘zaro tushunish va hamkorlik muhiti hukm surayotganlari undanda kamroq. Quvonarlisi, MOQ rahbarlari forumi aynan shunday hamkorlik formatlariga taalluqlidir. 2020-yildagi majburiy tanaffusdan so‘ng Toshkentda uchrashganimizdan cheksiz xursandman. Muloqot samimiy va munozaralar samarali bo‘lishiga chin dildan umid qilaman. Chunki undagi umumiy maqsad ko‘z o‘ngimizda o‘zgarayotgan dunyoda olimpizm tamoyillari va g‘oyalarini ilgari surishga undaydi.Otabek Umarov, OOK vitse-prezidenti
Shuningdek, tadbir davomida O‘zbekiston MOQ rahbari Rustam Shoabdurahmonov o‘z dasturi bilan ma’ruza qildi va quyidagi takliflarni ilgari surdi:
- Birgalikda Xalqaro toifadagi hakamlar va referilarni tayyorlashni yo‘lga qo‘yish;
- Zamonaviy sport va ta’lim metodikalari, innovatsion texnologiyalarni jalb qilgan holda murabbiylar, menejerlar, sport tahlilchilari va boshqa mutaxassislarni birgalikda tayyorlash;
- Terma jamoalar uchun qo‘shma xalqaro o‘quv-mashg‘ulot yig‘inlarini tashkil etish, keyin esa turli turnir va musobaqalarni o‘tkazish;
- Sport tibbiyotini rivojlantirish, xususan, sport shifokorlarining malakasini oshirish bo‘yicha tajriba almashish;
- Sport farmakologiyasini rivojlantirish, sportchilar uchun taqiqlanmagan dori vositalarini tayyorlash va ishlab chiqarish yo‘nalishidagi hamkorlikni faol rivojlantirish.
Eslatib o‘tamiz, Otabek Umarov 13-fevral kuni mototsiklni boshqarayotib, Toshkentning Mustaqillik shoh ko‘chasida, “Pushkin” metro bekati yaqinida Epica rusumli avtomobil bilan to‘qnashib ketgani xabar qilingandi. Shundan keyin uning Janubiy Koreyada davolanayotgani va 4-mart sanasida operatsiya qilinishi aytildi. Ushbu voqealardan keyin Umarov 24-oktabr kungi Prezidentlik saylovida ilk bor omma oldida ko‘rinish bergandi.
Izoh (0)