Абдулазиз Комилов Ўзбекистонда АЭС қурилиши бўйича жамоатчилик фикри ўрганилишини айтди

Ўзбекистон ташқи ишлар вазири Абдулазиз Комилов 22 октябрь куни Ўзбекистон ва Россия ОАВ вакиллари учун ўтказилган матбуот анжуманида Ўзбекистонда АЭС қуриш лойиҳасини амалга ошириш бўйича қандай чоралар кўрилаётгани ҳақида гапирди. Бу ҳақда ТИВ матбуот хизмати хабар берди.

Вазирнинг айтишича, ўзаро келишувга кўра, бу масала муҳокама қилинмоқда. Бугунги кунда лойиҳани ҳар томонлама ва бир неча йўналишда ўрганиш ишлари олиб борилмоқда. У, шунингдек, АЭС қурилиши ҳақида айрим оммавий ахборот воситаларида турли гап-сўзлар юргани сабабли бу соф иқтисодий лойиҳа эканини алоҳида таъкидлаб ўтди.

«Яна бир бор таъкидлаймиз — бу сиёсатдан холи, соф иқтисодий лойиҳа. Шунга яраша аниқ иқтисодий асос керак ва лойиҳанинг иқтисодий самарадорлиги исботланиши керак. Бу Ўзбекистонда муқобил энергия манбаларининг жадал ривожланиши фонида, айниқса, муҳим аҳамият касб этмоқда. Мамлакатимизда, жумладан, қуёш, шамол энергетикаси, гидроэнергетика ва бошқа энергетикани ривожлантириш бўйича таклифлар, қолаверса, тўғридан-тўғри инвестициялар тўплами мавжуд», — деган Абдулазиз Комилов.

Вазир, шунингдек, МАГАТЭ нормаларига мувофиқ хавфсизлик масалалари ҳақида ҳам унутмаслик кераклигини таъкидлаб ўтди.

«Яна бир муҳим, нозик масала бу — юқори технологияли ва кенг кўламли лойиҳа жамоатчилик эътиборидан четда қолиши, шаффоф бўлмаслиги мумкин эмас. Шу сабабли нафақат Ўзбекистон, балки мамлакатимиз билан чегарадош қўшни давлатлар жамоатчилигининг ҳам бу масалага муносабатини ўрганамиз», — деган ТИВ вазири.

«Шундай қилиб, биз ушбу масалаларни ўрганишни давом эттирамиз. Иш, албатта, давом этмоқда. Аммо ҳамма нарса юқоридаги саволларга бериладиган жавобларга боғлиқ бўлади. Шундан келиб чиқиб лойиҳани амалга ошириш ёки оширмаслик бўйича якуний қарор қабул қилинади», — дея сўзларини якунлаган Абдулазиз Комилов.

Эслатиб ўтамиз, 2019 йилда «Росатом» раҳбари Ўзбекистонда АЭС бўлишининг иқтисодий фойдаси ҳақида гапирганди. Унинг айтишича, АЭСга инвестиция қилинган ҳар бир доллар маҳаллий етказиб берувчиларга 1,9 доллар, мамлакатнинг ялпи ички маҳсулотига 4,3 доллар ва солиқ тушумлари шаклида бюджетга 1,4 доллар даромад келтириши мумкин.

«2019—2029 йилларда Ўзбекистон Республикада атом энергетикасини ривожлантириш концепциясини тасдиқлаш тўғрисида»ги Президент қарорига кўра, Ўзбекистон атом электр станцияси қурилишини 2022 йилдан эрта бошламайди.

Ҳужжатга кўра, мамлакатдаги илк атом электр станциясини барпо этиш уч босқичда амалга оширилади. Биринчи босқич — 2019—2020 йилларда АЭС қуриладиган жой аниқланади, 2020—2021 йилларда лойиҳанинг техник-иқтисодий асосини ишлаб чиқиш режалаштирилмоқда. 2022 йилдан эса объект қурилишига киришилади.

Россия дизайни асосида қуриладиган ушбу АЭС қиймати тахминан 11 миллиард долларга баҳоланган.