“Turizm, madaniy meros va muzeyshunoslik sohalarida malakali kadrlar tayyorlashning uzluksiz tizimini yanada takomillashtirish chora-tadbirlari to‘g‘risida”gi Prezident qarori qabul qilindi, deb xabar beradi Telegram’dagi “Huquqiy axborot” kanali.
Qarorga ko‘ra, “Ipak yo‘li” turizm xalqaro universiteti “Ipak yo‘li” turizm va madaniy meros xalqaro universiteti etib qayta nomlangan. Universitet ShHTga a’zo davlatlarning turizm, madaniy merosni boshqarish va muzeyshunoslik sohalarida kadrlar tayyorlovchi tayanch oliy ta’lim muassasasi hamda ushbu sohalarni ilmiy va innovatsion tadqiq etish bo‘yicha ilmiy muassasaga aylantirilgan.
2022/2023-o‘quv yilidan Shahrisabz, Marg‘ilon va Xiva turizm va servis kollejlari negizida Shahrisabz, Marg‘ilon va Xiva turizm va madaniy meros texnikumlari (Madaniy meros texnikumlari) tashkil etiladi. Shuningdek, Toshkent turizm va servis kolleji negizida universitetning Toshkent filiali tashkil etilgan.
Universitet huzurida quyidagilar o‘z faoliyatini boshlaydi:
- “Ipak yo‘li” xalqaro tadqiqot instituti;
- “Ipak yo‘li” muzeyi;
- “Ipak yo‘li” art-rezidensiyasi;
- “Ipak yo‘li” san’at galereyasi;
- Restavratorlarni qayta o‘qitish va malakasini oshirish markazi.
“El-yurt umidi” jamg‘armasining 2022–2026-yillarda xorijdagi nufuzli ta’lim muassasalarida turizm, madaniy meros va muzeyshunoslik yo‘nalishlarida doktorantura (PhD) va magistraturada o‘qitish dasturi joriy qilinadi. Dastur doirasida 50 nafar iqtidorli mutaxassis (40 nafari magistratura va 10 nafari doktorantura (PhD) bosqichida) o‘qitiladi.
Ma’lumot uchun, Samarqand shahridagi “Ipak yo‘li” xalqaro turizm universiteti Prezidentning 2018-yil 28-iyundagi qarori asosida tashkil etilgandi.
Eslatib o‘tamiz, 2020-yilda Qishloq xo‘jaligi kasb-hunar kollejlari negizida oliy maktablar o‘rniga agrotexnologiyalar texnikumlari tashkil etilgan, O‘zbekistondagi tibbiyot kollejlari Ibn Sino nomidagi salomatlik texnikumlariga aylantirilgan edi.
Izoh (0)