«Туризм, маданий мерос ва музейшунослик соҳаларида малакали кадрлар тайёрлашнинг узлуксиз тизимини янада такомиллаштириш чора-тадбирлари тўғрисида»ги Президент қарори қабул қилинди, деб хабар беради Telegram’даги «Ҳуқуқий ахборот» канали.
Қарорга кўра, «Ипак йўли» туризм халқаро университети «Ипак йўли» туризм ва маданий мерос халқаро университети этиб қайта номланган. Университет ШҲТга аъзо давлатларнинг туризм, маданий меросни бошқариш ва музейшунослик соҳаларида кадрлар тайёрловчи таянч олий таълим муассасаси ҳамда ушбу соҳаларни илмий ва инновацион тадқиқ этиш бўйича илмий муассасага айлантирилган.
2022/2023-ўқув йилидан Шаҳрисабз, Марғилон ва Хива туризм ва сервис коллежлари негизида Шаҳрисабз, Марғилон ва Хива туризм ва маданий мерос техникумлари (Маданий мерос техникумлари) ташкил этилади. Шунингдек, Тошкент туризм ва сервис коллежи негизида университетнинг Тошкент филиали ташкил этилган.
Университет ҳузурида қуйидагилар ўз фаолиятини бошлайди:
- «Ипак йўли» халқаро тадқиқот институти;
- «Ипак йўли» музейи;
- «Ипак йўли» арт-резиденцияси;
- «Ипак йўли» санъат галереяси;
- Реставраторларни қайта ўқитиш ва малакасини ошириш маркази.
«Эл-юрт умиди» жамғармасининг 2022–2026 йилларда хориждаги нуфузли таълим муассасаларида туризм, маданий мерос ва музейшунослик йўналишларида докторантура (PhD) ва магистратурада ўқитиш дастури жорий қилинади. Дастур доирасида 50 нафар иқтидорли мутахассис (40 нафари магистратура ва 10 нафари докторантура (PhD) босқичида) ўқитилади.
Маълумот учун, Самарқанд шаҳридаги «Ипак йўли» халқаро туризм университети Президентнинг 2018 йил 28 июндаги қарори асосида ташкил этилганди.
Эслатиб ўтамиз, 2020 йилда Қишлоқ хўжалиги касб-ҳунар коллежлари негизида олий мактаблар ўрнига агротехнологиялар техникумлари ташкил этилган, Ўзбекистондаги тиббиёт коллежлари Ибн Сино номидаги саломатлик техникумларига айлантирилган эди.
Изоҳ (0)