Shavkat Mirziyoyev 2022-yil Vengriyaga borishi kutilmoqda. Bu haqda Vengriya bosh vaziri Viktor Orban Prezidentning saylovda g‘alaba qozongani munosabati bilan yo‘llagan tabrigida ma’lum qildi.
“Hurmatli Prezident janoblari! Sizni O‘zbekiston Respublikasi Prezidenti lavozimiga qayta saylanganingiz bilan muborakbod etishga ijozat bergaysiz.
2021-yil mart oyida Toshkentda samarali fikr almashganimiz va mamlakatlarimiz o‘rtasidagi Strategik sheriklik to‘g‘risidagi bayonotni imzolaganimizdan mamnunman. Turkiy Kengash doirasidagi hamkorligimiz Vengriya va O‘zbekiston o‘rtasidagi do‘stona munosabatlarni mustahkamlashga yangi sur’at bag‘ishlaydi. Ishontirib aytamanki, mening hukumatim ikki tomonlama munosabatlarimizni rivojlantirib borishda har doimgidek qat’iydir.
Kelgusi yilda Budapeshtda rasmiy tashrif doirasida Prezident janoblari bilan shaxsan uchrashishdan umidvorman hamda ushbu tashrif munosabatlarimizni mustahkamlash uchun yana bir imkoniyat bo‘lishiga ishonaman.
Oldingizda turgan mas’uliyatli vazifalarni ro‘yobga chiqarishda Sizga omad va mustahkam sog‘liq tilayman!”, – deydi Vengriya bosh vaziri qutlovida.
Eslatib o‘tamiz, 2021-yil 29-mart kunida Vengriya bosh vaziri O‘zbekistonga tashrif buyurgandi. Tashrif davomida O‘zbekiston va Vengriya savdo-iqtisodiy hamkorlikni yanada kengaytirishi kelishib olingan. Ikki mamlakat o‘rtasida strategik sheriklik to‘g‘risidagi qo‘shma deklaratsiya va o‘ndan ortiq hujjat imzolangan.
Izoh (0)