Ўзбекистон Табиатни муҳофаза қилиш халқаро иттифоқи (International Union for Conservation of Nature and Natural Resources, IUCN)га аъзо бўлди, деб хабар бермоқда «Gazeta.uz» Экология ва атроф-муҳитни муҳофаза қилиш давлат қўмитасига таяниб.
Қайд этилишича, Ўзбекистон иттифоқ сафига қўшилган 92-мамлакат ва Марказий Осиёда биринчи давлат бўлди.
«Биз Ўзбекистоннинг IUCN’га аъзо бўлганини қайд этишдан мамнунмиз ва Экология ва атроф-муҳитни муҳофаза қилиш давлат қўмитаси ва мамлакатдаги бошқа шериклат билан ҳамкорликни кенгайтиришга умид қиламиз», — деган IUCN’нинг Шарқий Европа ва Марказий Осиё бўйича минтақавий бюроси директори Борис Эрж.
«Биз биргаликда ўрганаётган ҳамкорликнинг потенциал йўналишлари қаторига экология сиёсати, муҳофаза этиладиган табиий ҳудудлар миллий тармоғини кенгайтириш ва сифатини таъминлаш, ‘Қизил рўйхат’ индексларини ишлаб чиқиш, ерни комплекс бошқариш ва экотизимни тиклаш киради», — деб қайд этган у.
Ташкилот сайтида қайд этилишича, Табиатни муҳофаза қилиш халқаро иттифоқи Ўзбекистонни табиий ресурслардан барқарор фойдаланиш, жумладан, биохилма-хилликни сақлаш ва экотизимларни тиклашда қўллаб-қувватлашда давом этади, бу эса иқлим ўзгариши оқибатларини юмшатиш ва мослашишга ҳисса қўшиш баробарида миллий экологик мақсадларга эришишга ёрдам беради.
Хабарда айтилишча, ўтган ҳафта Экология давлат қўмитаси раиси ўринбосари Жусипбек Казбеков бошчилигидаги Ўзбекистон делегацияси ташкилотнинг Швейцариядаги штаб-квартирасида бўлиб, у ерда ТМҚХИнинг ривожланиш гуруҳи глобал директори Энрике Ламанн билан учрашди. Томонлар, жумладан, келажакдаги қўшма грант лойиҳаларини муҳокама қилди.
Маълумот учун, Табиатни муҳофаза қилиш халқаро иттифоқи 1948 йилда ЮНЕСКО ташаббуси билан ташкил этилган. Иттифоққа 120 та давлат ташкилоти ва (Ўзбекистон қўшилиши билан) 92 та давлат аъзо ҳисобланади. Иттифоқда иштирок этиш Ўзбекистонга Глобал экологик фонд ва Яшил иқлим жамғармаси (ТМҚХИ ушбу ташкилотларнинг аккредитацияланган агентлиги ҳисобланади) томонидан экологик лойиҳалар учун грант маблағларини жалб қилиш, шунингдек, табиатни муҳофаза қилиш соҳасидаги стратегик ҳужжатлар ишлаб чиқишда ТМҚХИ халқаро стандартларини қўллаш имконини беради.
Изоҳ (0)