Qarshi shahridagi Prezident maktabida 2021-yilning 30-oktabr kuni ochiq eshiklar kuni bo‘lib o‘tdi. Mazkur tadbirda qatnashgan “Daryo” muxbiri 78 milliard 200 million so‘mga qurib bitkazilgan maktab binosining e’tiborga molik joylarini suratga oldi.
Qayd etilishicha, mazkur maktabda ayni kunda 144 nafar o‘quvchi tahsil oladi.
Maktabda AQSH, Filippin va Janubiy Afrikadan kelgan 10 nafar xorijlik o‘qituvchi dars beradi.
“Qarshida Prezident maktabi ish boshlagach, o‘qishga kirish uchun 11002 nafar o‘quvchi hujjat topshirdi. Shundan 144 nafar bola saralanib, ayni kunda maktabimizda tahsil olmoqda”, — deydi maktab psixologi Husnora Nurmatova.
Ma’lum bo‘lishicha, maktabda ikki qavatli 17 ta sinfxona, 3 ta laboratoriya hamda 1 ta o‘qituvchilar xonasi, shuningdek, 168 o‘rinli uch qavatdan iborat o‘quv bino va xorijdan kelgan o‘qituvchilar uchun 15 o‘rinli mehmonxona mavjud.
“Qolaversa, maktabimizda futbol stadioni, voleybol hamda basketbol maydonchasi, gimnastika hali va suzish havzasi bor”, — deydi “Daryo” muxbiriga hamrohlik qilgan Husnora Nurmatova.
Maktab direktori Sardor Sodiqovning qo‘shimcha qilishicha, Prezident maktabi ishga tushgach, jami 93 ta yangi ish o‘rni yaratilgan.
Izoh (0)