Бердимуҳамедов янги автотрассанинг бир қисмини очиб бериб, унда янги «КамАЗ»ни синовдан ўтказди (фото)

29 октябрь куни Туркманистон президенти Гурбангули Бердимуҳамедов Ашхобод—Туркманобод автобанининг Ашхобод-Тежен йўли участкасини очиб берди. Очилиш маросими тантаналари дастурини президент аввалроқ бўлиб ўтган Вазирлар Маҳкамасининг мажлисида тасдиқлаганди, деб ёзади «Хроника Туркменистана».

Туркманистон давлат ахборот агентлиги маълумотларига кўра, йўл Саноатчилар ва тадбиркорлар иттифоқи аъзоси Türkmen Awtoban ОАЖ томонидан қурилмоқда, 2,3 миллиард долларлик лойиҳа 2023 йилнинг декабрь ойида якунланиши керак. Умумий узунлиги 600 километр бўлган автобан олтита ҳаракат чизиғидан иборат.

Трасса Ашхобод-Тошҳовуз автомобиль йўлининг 24-километридаги чорраҳадан бошланади. У ерда тўлов марказлари ва йўл ҳаракати назорати пункти қурилган. Ҳаммаси бўлиб автобан 10 та станцияга хизмат кўрсатади.

Гурбангули Бердимуҳамедов «Ашхобод» терминалида Ашхобод-Тежен йўлининг 203 километрлик қисмини очиб берди.

«Техник хусусиятларига кўра автобан халқаро стандартларга жавоб беради. Магистрал йўл бўйлаб савдо марказлари, умумий овқатланиш шохобчалари, меҳмонхоналар қурилди. Йўл яқинида электрон тўлов терминаллари, видеокузатув мосламалари, радарлар, алоқа пунктлари, қуёш энергияси билан ишлайдиган ёритиш устунлари ўрнатилди», — деди президент.

Очилиш маросимида иштирок этган Австриянинг VCE Vienna Consulting Engineers ZT GmbH компанияси директори Домагой Перковичнинг айтишича, йўл ISO 9001 стандартига мувофиқлик сертификати билан тақдирланган.

Видеоалоқа орқали сўзга чиққан Германиянинг «Рейн-Вестфалия» транспорт коммуникациялари вазирлиги маслаҳат бўлими аъзоси, Транспорт фанлари институти профессори Вольфганг Шульц йўлни юқори даражадаги хавфсизлик сертификати билан тақдирлади, Дорнбирн шаҳри (Австрия) транспорт коммуникациялари ва инфратузилмаси департаменти эса йўл қурилишида инновацион юқори технологиялардан фойдаланилганини тасдиқловчи сертификатни тақдим этди.

Кейин Гурбангули Бердимуҳамедов Йўл бошқаруви марказини кўздан кечирди, сўнг автомобилда трассага чиқди ва «ҳаракатни бошлашга ўз фотиҳасини берди». Унинг ортидан юк машиналари ва енгил машиналар йўл бўйлаб ҳаракатланди.

Туркманистон ахборот агентлиги маълумотларига кўра, йўлнинг икки томонида санъаткорлар ва Ахалтеке отларини минган чавандозлар чиқишлар қилган, шунингдек, бозор импровизация қилинган.

Тўхтаган вақтида Гурбангули Бердимуҳамедов «КамАЗ» ОАЖ директорлар кенгаши раиси Сергей Ткаченко билан суҳбатлашди. Тадбиркор янги «КамАЗ» модели — узоқ масофага мўлжалланган музлаткичли юк машинаси ишлаб чиқарилганини маълум қилди. У машинани президентга тақдим этиб, уни янги йўлда тест-драйв қилишни сўради.

Синовдан сўнг Бердимуҳамедов ўз таассуротлари билан ўртоқлашди, унинг сўзларига кўра, юк машинаси жуда қулай, ҳайдашга осон, ҳайдашнинг иқтисодий, хавфсизлик ва экологик қоидаларига тўла жавоб беради. Шунингдек, ташқи кўриниши ва ички қисми ўзаро мутаносиб. Автомобиль тезлигини ошириш жуда осон. Тормоз тизими ҳам ўз вазифасини яхши бажаради. «Ҳеч қандай салбий томонлар сезилмади. Худди шу нарсани ишлов бериш ҳақида ҳам айтиш мумкин. Машина рул бурилишларига аниқ жавоб беради ва йўл бўйлаб яхши ҳаракатланади», — деди Бердимуҳамедов.