Бирлашган Араб Амирликлари расмийлари Ливандаги дипломатларининг бир қисмини чақириб олмоқчи. Бу қарор Саудия Арабистони билан бирдамлик сифатида қабул қилинган, деб ёзади «Korrespondent.net».
Бундан ташқари, БАА Ташқи ишлар вазирлиги фуқароларга Ливанга сафар қилишдан бош тортишни тавсия қилмоқда.
БАА давлат вазири Халиф Шоҳин ал-Марарнинг таъкидлашича, дипломатларни олиб чиқиш қарори Ливандаги айрим расмийларнинг Саудия Арабистонига нисбатан номақбул муносабатини ҳисобга олган ҳолда, БААнинг Саудия Арабистони билан бирдамлигини тасдиқлайди.
Дипломатларни чақириб олиш тўғрисидаги қарор Ливандаги БАА элчихонасининг консуллик бўлими ва виза хизматига таъсир қилмайди, улар фаолиятини давом эттиради.
Эслатиб ўтамиз, Саудия Арабистонида Ливандан маҳсулотлар импорт қилишни тақиқлаган ва Ливан элчисига 48 соат ичида мамлакатни тарк этишни буюрган. Аввалроқ Саудия ҳукумати Ливандаги элчисини консультация учун чақириб олганди.
Дипломатик можарога Ливан ахборот вазири Георг Кордахининг август ойида Al-Jazeera телеканалига берган интервьюсида Ямандаги Саудия Арабистони бошчилигидаги коалиция ҳаракатларини босқинчилик деб атагани сабаб бўлган.
МТV каналининг маълум қилишича, Ливан билан дипломатик муносабатларни Форс кўрфази араб давлатларининг ҳамкорлик кенгашига аъзо барча давлатлар (Саудия Арабистонидан ташқари, Қатар, Кувайт, БАА, Баҳрайн ва Уммон) узишга тайёр.
Мавзуга доир:
Изоҳ (0)