Зарафшон дарёсининг «Навоийазот» яқинидаги ҳудудида оммавий заҳарланиш юзага келиб, балиқлар нобуд бўлганди. Навоий вилояти прокуратураси ҳолат юзасидан жиноят иши қўзғатилганини маълум қилди.
Қайд этилишича, ушбу ҳолат бўйича вилоят прокуратураси томонидан тегишли соҳа мутахассислари жалб қилинган ҳолда кенг қамровли текширув ўтказилди. Бу жараёнда саноат корхоналаридан Зарафшон дарёсига оқизилган чиқинди сувлар таркиби ва нобуд бўлган балиқларда махсус лаборатория ва экспертиза таҳлиллари ўтказилиб, тегишли хулосалар олинди ва бошқа ҳолатлар атрофлича ўрганилди.
Текширув натижалари Зарафшон дарёсига азот аммоний, нитрит ва бошқа кимёвий моддалар меъёридан ортиқча миқдорда оқизилгани сабабли дарёдаги кўплаб балиқлар нобуд бўлганини кўрсатди.
Мазкур ҳолат юзасидан вилоят прокуратураси томонидан 28 октябрь куни Жиноят кодексининг 196-моддаси (атроф табиий муҳитни ифлослантириш) 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
Эслатиб ўтамиз, Навоий вилояти Экология ва атроф-муҳитни муҳофаза қилиш бошқармаси инспекторлари ўз фаолиятини олиб боришда Зарафшон дарёсининг Кармана туманидан оқиб ўтувчи қисми сувининг ранги бироз ўзгаргани, балиқлар нобуд бўлаётганига жиддий эътибор қаратиб, бу ҳолатнинг сабабини ўрганганди.
Ўрганиш давомида бошқарманинг Аналитик лаборатория масъул ходимлари, Кармана тумани Экология инспекцияси давлат инспекторлари, вилоят Ветеринария лабораторияси ва «Навоийазот»нинг санитар лабораторияси мутахассислари ҳамкорлигида дарёнинг 5 та нуқтасидан таҳлил намуналари олинди.
Натижада «Навоийазот»га қарашли (1-ташлама) 267-қудуқдан азот аммоний 21 маротаба, азот нитрат 2,6 маротаба, азот нитрит 60 маротаба, хлоридлар 1,3 маротаба, мис ионлари 2,1 маротаба белгиланган меъёрлардан юқорилиги ҳамда дарёда оммавий заҳарланиш юзага келгани аниқланди.
Ўзбекистон Экологик партияси ҳолатга муносабат билдириб, Вазирлар Маҳкамасининг 2020 йил 7 сентябрдаги «Атроф-муҳитга таъсирни баҳолаш механизмини янада такомиллаштириш тўғрисида»ги қарорига кўра, «Навоийазот» атроф-муҳитга таъсир кўрсатишнинг I тоифаси, яъни юқори даражадаги хавфли объектлар қаторига киришини маълум қилди.
«Атроф-муҳитга хавф даражаси юқори бўлган бу корхонадан бунчалик кўп миқдорда хавфли кимёвий моддаларнинг очиқ табиатга чиқариб юборилиши биринчи галда қўпол қонунбузарлик ва шу билан бирга, корхона томонидан атроф-муҳит муҳофазасига эътиборсизликнинг яққол кўринишидир», — дейилади партия муносабатида.
«Навоийазот» Зарафшон дарёсида кўплаб балиқлар нобуд бўлишига олиб келган заҳарли оқова сувлари чиқарилганини рад этиб, бунда бошқа ишлаб чиқариш комплекслари, шу жумладан, балиқчилик хўжаликларини айблади.
Изоҳ (0)