Markaziy saylov komissiyasi 29-oktabr kuni bo‘lib o‘tgan yig‘ilishida Shavkat Mirziyoyevni keyingi besh yilga O‘zbekiston Prezidenti lavozimiga saylangan deb hisoblash to‘g‘risida qaror qabul qildi. Bu haqda MSK matbuot xizmati “Daryo”ga ma’lum qildi.
24-oktabr kuni o‘tkazilgan saylov natijalariga ko‘ra, mamlakatdagi 20 158 907 nafar saylovchining 16 212 343 nafari, ya’ni 80,4 foizi saylovda ishtirok etgan. Foydalanilmagan va buzib qo‘yilib, bekor qilingan saylov byulletenlarining umumiy soni 4 047 358 tani tashkil etgan.
Ovoz berishda ishtirok etgan saylovchilar tomonidan har bir nomzodni yoqlab berilgan ovozlar soni quyidagicha:
- “Adolat” sotsial-demokratik partiyasidan nomzod Bahrom Abduhalimovga – 549 ming 766 nafar yoki ovoz berishda ishtirok etgan saylovchilarning 3,39 foizi;
- Tadbirkorlar va ishbilarmonlar harakati – O‘zbekiston Liberal-demokratik partiyasidan nomzod Shavkat Mirziyoyevga – 12 million 988 ming 964 nafar yoki ovoz berishda ishtirok etgan saylovchilarning 80,12 foizi;
- Ekologik partiyadan nomzod Narzullo Oblomuradovga – 670 ming 641 nafar yoki ovoz berishda ishtirok etgan saylovchilarning 4,14 foizi;
- “Milliy tiklanish” demokratik partiyasidan nomzod Alisher Qodirovga – 888 ming 515 nafar yoki ovoz berishda ishtirok etgan saylovchilarning 5,48 foizi;
- Xalq demokratik partiyasidan nomzod Maqsuda Vorisovaga – 1 million 75 ming 16 nafar yoki ovoz berishda ishtirok etgan saylovchilarning 6,63 foizi yoqlab ovoz bergan.
Saylov kodeksiga ko‘ra, O‘zbekiston Prezidenti Markaziy saylov komissiyasi tomonidan Prezident saylovi natijalari rasmiy ravishda e’lon qilingan kundan e’tiboran kechi bilan ikki oy ichida Oliy Majlis palatalarining qo‘shma majlisida qasamyod qilgan paytdan e’tiboran o‘z lavozimiga kirishadi.
Eslatib o‘tamiz, 25-oktabr kuni Markaziy saylov komissiyasi prezident saylovlarining dastlabki natijalarini e’lon qilishdan avval Rossiya prezidenti Vladimir Putin, Belarus prezidenti Aleksandr Lukashenko va Qozog‘iston prezidenti Qosim-Jo‘mart To‘qayev Shavkat Mirziyoyevni prezidentlik saylovidagi “ishonchli g‘alabasi” bilan tabriklagan edi.
Izoh (0)