Ўзбекистонда 2021 йилнинг 9 ойида қонунбузарлардан 16,3 млрд сўм ундириб олинган — Экология қўмитаси

АОКАда Экология ва атроф-муҳитни муҳофаза қилиш давлат қўмитаси мутасаддилари иштирокида матбуот анжумани бўлиб ўтди. Тадбирда экологик назорат рейдларида ҳамда браконьерликка қарши курашишда аниқланган ҳолатлар ҳақида маълумот берилди.

Қайд этилишича, 2021 йилнинг ўтган 9 ойи мобайнида соҳага оид қонунчилик ҳужжатлари талабларини бузган 34 275 нафар шахс аниқланди. 32 миллиард сўм маъмурий жарима ва табиатга етказилган зарарлар ҳисобланиб, 16,3 миллиард сўм ундириб олинган.

1365 та ҳолат бўйича 15 миллиард сўм жарима ва табиатга етказилган зарарларни ундириш юзасидан тайёрланган материаллар ҳуқуқни муҳофаза қилиш органларига киритилган. 12 та ҳолат бўйича 1,6 миллиард сўмлик даъволар юзасидан қонунбузарлик содир этган шахсларни жиноий жавобгарликка тортиш бўйича иш қўзғатилган.

Ҳуқуқбузарлардан 376 дона ҳайвон ва парранда, 1 900 килограмм балиқ, 49 637 килограмм доривор ва озиқ-овқатбоп ўсимликлар, 1520 метр куб ўтин, 45 та ов қурол ва 570 та аслаҳа ва бошқа инвентарлар олиб қўйилган.

Инспекция томонидан 23 та идоравий хизмат текширувлари ўтказилиб, натижаси бўйича аниқланган камчиликлар ва ходимларга чора кўриш юзасидан тегишли таклифлар киритилди ва ижрога қаратилган.

Жумладан, Бош прокуратура, Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил (омбудсман) тақдимномалари, фуқаролар мурожаатлари ҳамда бошқа асосларга мувофиқ Сурхондарё, Жиззах, Навоий, Тошкент, Бухоро, Самарқанд, Хоразм, Қашқадарё вилоятлари ва Тошкент шаҳар бошқармаларида хизмат текшируви ўтказилган.

Давлат инспекторлари томонидан аниқланган ҳуқуқбузарлик ҳолатлари 2020 йилнинг мос даврига нисбатан:

• Қорақалпоғистон Республикасида 114 фоизга;
• Бухоро вилоятида 112 фоизга;
• Қашқадарё вилоятида 108 фоизга;
• Андижон вилоятида 104 фоизга;
• Хоразм вилоятида 70 фоизга;
• Тошкент вилоятида 74 фоизга;
• Жиззах вилояти ва Тошкент шаҳрида 80 фоизга ўсиш кузатилган.