2022-yilda Shanxay hamkorlik tashkiloti davlat rahbarlarining navbatdagi sammiti Samarqandda o‘tishi kutilmoqda. Shu sababli va umuman olganda, Samarqandda juda katta qurilish ishlari ketmoqda. Telegram’dagi “Davletovuz” kanalining ochiq ma’lumotlar asosida ma’lum qilishicha, aksariyat yirik qurilish-rekonstruksiya ishlari Enter Engineering, ERIELL kompaniyalar guruhi boshqaruvi raisi Baxtiyor Fazilov va uning yaqinlariga (Mirankul Group) taalluqli kompaniyalar tomonidan bajarilmoqda.
Samarqand xalqaro aeroportini rekonstruksiya qilish
Loyiha qiymati 238,2 milliard so‘mga baholangan. Reklama materiallariga ko‘ra, mazkur obyektni rekonstruksiya qilish bilan Enter Engineering kompaniyasi shug‘ullanmoqda. Hukumat qarori bilan Samarqand aeroporti davlat-xususiy sheriklik tamoyili asosida 20 yilga Air Marakanda kompaniyasiga boshqaruvga berilgan. Tendersiz. “Gazeta.uz” ma’lumotlariga ko‘ra, kompaniya 80 million dollar investitsiya kiritish majburiyatini olgan.
Air Marakanda kompaniyasining yagona ta’sischisi ofshorda — Kiprda ro‘yxatdan o‘tgan Drupola Holdings Limited kompaniyasi hisoblanadi. Mazkur kompaniya joylashgan yuridik manzilda Ferkensco Management Limited va Eriell Holding Company Limited kompaniyalari ham joylashgan. “Samarqandkimyo”ning 100 foiz ulushi o‘z vaqtida Ferkensco kompaniyasiga nol qiymatda sotilgan edi.
Silk Road sayyohlik markazini barpo etish
212 gektarlik maydonda barpo etilgan ushbu loyihaning qiymati 353 million dollar bo‘lib, buyurtmachi Samarkand Touristic Centre kompaniyasi hisoblanadi. Mazkur kompaniyaning 60 foiz ulushi Baxtiyor Shuhratovich Fazilovga taalluqli. Pudratchi ham buyurtmachiga aloqador bo‘lgan Enter Engineering kompaniyasidir.
Imom Buxoriy ziyoratgohining yangi majmuasi qurilishi
Loyiha qiymati noma’lum. Pudratchi Enter Engineering kompaniyalar guruhi bo‘lib, 7 ta mehmonxona, 3 ta avtoturargoh va avtobekat, supermarket, bozorcha barpo etiladi. Shuningdek, oshxonalar, hunarmandchilik buyumlari rastasi, hammom, tahoratxona, kushxona qurilishi rejalashtirilgan.
Samarqand shahrida 168 o‘rinli maktab qurilishi
Loyiha qiymati 74 milliard so‘m. Davlat xaridlari portali ma’lumotlariga ko‘ra, mazkur obyektning pudratchisi Innocraft MChJ hisoblanadi. Innocraft 2019-yil iyun oyida tashkil etilgan bo‘lib, asosiy ulushi — 99,80 foiz ulush Mirankul Group xususiy korxonasiga, Mirankul Group esa to‘lig‘icha Usmanov Otabek Alimjonovichga tegishli. Usmanov Otabek va Baxtiyor Fazilov Mirankul Stroy Servis, Mirankul Construction Materials Ltd, Mirankul Group Tower, Mirankul Meva (tugatilgan), Paradise Gardens (tugatilgan), Surxon Golden Fruits (tugatilgan) kabi kompaniyalarda bevosita yoki bilvosita ulushdorlik qilgan. Innocraft MChJ bundan tashqari qator ijtimoiy obyektlarni qurish bilan shug‘ullanmoqda.
Internetdagi ma’lumotlarga ko‘ra, Singapurda ro‘yxatda o‘tgan Enter Engineering kompaniyasining 51 foiz ulushiga Baxtiyor Fazilov Kiprda ro‘yxatdan o‘tgan Klintworth Investments kompaniyasi orqali egalik qiladi. 19 foizi esa Rossiyaning “Gazprombank”iga tegishli. Kompaniya Inqirozga qarshi kurashish jamg‘armasi mablag‘lari hisobidan Zangiota yuqumli kasalliklar shifoxonasini va boshqa obyektlarni ham qurgan. Baxtiyor Fazilov, shuningdek, Wind Rose MChJ orqali Humo Arena savdo belgisiga, Samarqandda Family Park kompaniyasiga ham egalik qiladi. 2019-yilda “Fidokorona xizmatlari uchun” ordeni bilan taqdirlangan.
Izoh (0)