Birlashgan Millatlar Tashkiloti Frenki ismli dinozavr dunyo yetakchilariga murojaat qilib, insoniyatni iqlim o‘zgarishi xavfidan ogohlantirgani aks etgan videorolikni e’lon qildi. Video BMTning YouTube kanaliga joylangan.
Video boshida tiranozavr Nyu-Yorkdagi BMT Bosh assambleyasi zaliga bostirib kiradi va minbarda turib diplomatlarga global isish muammosi haqida gapiradi. “Qirilib ketish — yomon. Harqalay bizda asteroid bor edi, lekin sizning bahonangiz nima?”, — deydi Frenki.
“Siz iqlim falokatiga qarab ketyapsiz. Shunga qaramay, har yili hukumatlar yoqilg‘i qazib olish uchun subsidiyalarga yuzlab milliardlab davlat mablag‘larini sarflaydi. Bu miqdor sayyoramizning butun aholisi uchun koronavirus vaksinasini sotib olish yoki qashshoqlikni butunlay yo‘q qilish uchun yetarli bo‘lardi. Barcha tirik mavjudotlarning yo‘q bo‘lib ketishini yaqinlashtirish o‘rniga ularga yordam berish yaxshiroq emasmi?”, — deydi dinozavr Frenki.
Frenki ismli dinozavr videosi BMTning iqlim o‘zgarishiga bag‘ishlangan yangi “Qirilib ketishga rozi bo‘lma” kampaniyasining bir qismidir. Videoda dinozavrga aktyor va musiqachi Jek Blek ovoz bergan.
BMT ma’lumotlariga ko‘ra, mamlakatlar qazib olinadigan yoqilg‘iga har yili qariyb 423 milliard dollar sarflaydi, ammo kambag‘al mamlakatlarga global isishga qarshi kurashda yordam bermaydi. BMT bosh kotibi Antoniu Guterrish bir necha bor yoqilg‘i qazib olish uchun subsidiyalarni to‘xtatishga chaqirgan, biroq hukumatlar rahbarlari narxlarning oshishi mamlakatlarda tartibsizliklar va ish tashlashlarga olib kelishidan qo‘rqmoqda.
Izoh (0)