Бирлашган Миллатлар Ташкилоти Фрэнки исмли динозавр дунё етакчиларига мурожаат қилиб, инсониятни иқлим ўзгариши хавфидан огоҳлантиргани акс этган видеороликни эълон қилди. Видео БМТнинг YouTube каналига жойланган.
Видео бошида тиранозавр Нью-Йоркдаги БМТ Бош ассамблеяси залига бостириб киради ва минбарда туриб дипломатларга глобал исиш муаммоси ҳақида гапиради. «Қирилиб кетиш — ёмон. Ҳарқалай бизда астероид бор эди, лекин сизнинг баҳонангиз нима?», — дейди Фрэнки.
«Сиз иқлим фалокатига қараб кетяпсиз. Шунга қарамай, ҳар йили ҳукуматлар ёқилғи қазиб олиш учун субсидияларга юзлаб миллиардлаб давлат маблағларини сарфлайди. Бу миқдор сайёрамизнинг бутун аҳолиси учун коронавирус вакцинасини сотиб олиш ёки қашшоқликни бутунлай йўқ қилиш учун етарли бўларди. Барча тирик мавжудотларнинг йўқ бўлиб кетишини яқинлаштириш ўрнига уларга ёрдам бериш яхшироқ эмасми?», — дейди динозавр Фрэнки.
Фрэнки исмли динозавр видеоси БМТнинг иқлим ўзгаришига бағишланган янги «Қирилиб кетишга рози бўлма» кампаниясининг бир қисмидир. Видеода динозаврга актёр ва мусиқачи Жек Блек овоз берган.
БМТ маълумотларига кўра, мамлакатлар қазиб олинадиган ёқилғига ҳар йили қарийб 423 миллиард доллар сарфлайди, аммо камбағал мамлакатларга глобал исишга қарши курашда ёрдам бермайди. БМТ бош котиби Антониу Гутерриш бир неча бор ёқилғи қазиб олиш учун субсидияларни тўхтатишга чақирган, бироқ ҳукуматлар раҳбарлари нархларнинг ошиши мамлакатларда тартибсизликлар ва иш ташлашларга олиб келишидан қўрқмоқда.
Изоҳ (0)