Finlyandiya gazetasining uch nafar jurnalisti davlat sirlarini oshkor qilganlikda ayblandi

Finlyandiya prokuraturasi mamlakatdagi yirik Helsingin Sanomat gazetasining uch xodimini davlat xavfsizligiga oid sirlarni oshkor qilganlikda aybladi. Bu haqda Yle telekompaniyasiga tayanib, “TASS” xabar berdi.

Ushbu modda bo‘yicha eng kami to‘rt oy, eng ko‘pi to‘rt yilgacha qamoq jazosi belgilanishi mumkin. Uchala jurnalist ham o‘z ayblarini inkor etmoqda.

Avvalroq Finlyandiya Markaziy jinoiy politsiyasi  “Mamlakat tashqi xavfsizligini ta’minlash uchun sir saqlanishi kerak bo‘lgan ma’lumotlar Helsingin Sanomat ofisida qayta ishlangan” deb gumon qilishga asos borligini xabar qilgandi. Qayd etilishicha, “ushbu maxfiy ma’lumotlarning bir qismi bo‘yicha materiallar — rejalashtirilgan ma’lumotlar seriyasining birinchi qismi nashr etilgan, qolgan qismi dastlabki tergov boshlangani sababli nashr etilmagan”.

Shu bilan birga, politsiya jurnalistlarga kelib tushgan ma’lumotlar noqonuniy yo‘l bilan olinmagan degan xulosaga keldi.

Tergovning boshlanishi

2017-yil dekabr oyi o‘rtalarida Finlyandiya markaziy jinoiy politsiyasi Helsingin Sanomat gaetasining mamlakat harbiy razvedkasiga, jumladan, Rossiyaga aloqador maxfiy hujjatlarni chop etishi bo‘yicha tergov boshladi. Xususan, nashr Rossiya harbiylarning kuzatuvi va Finlyandiya razvedkasining “Shimoliy oqim” gaz quvuri bo‘yicha xavotirlari haqida yozgan.

Finlyandiya qonunchiligiga ko‘ra, davlat sirlarini oshkor qilganlik uchun gumondorlarga to‘rt yildan umrbodgacha qamoq jazosi, rasmiy sirni e’lon qilganlik uchun – miqdori sud tomonidan belgilanadigan jarima yoki ikki yilgacha qamoq jazosi tayinlanadi.

Tergov doirasida 2017-yil dekabr oyida gazeta jurnalisti Laura Xalminenning uyida tintuvlar o‘tkazilgan, chunki u shov-shuvli maqola mualliflaridan biri edi. O‘shanda politsiya uning shaxsiy va ofis telefonlari, kompyuter, planshet va bir nechta flesh-kartalarini musodara qildi. Tintuvdan oldin jurnalist undagi ma’lumotlarni yo‘q qilish va olingan ma’lumotlar manbalarini himoya qilish uchun kompyuterining qattiq diskini bolg‘a bilan sindirib tashlagan.

Biroq keyinroq Finlyandiya Oliy sudi mamlakat politsiyasiga jurnalistdan tortib olingan elektron ommaviy axborot vositalari ma’lumotlarini o‘rganish va ulardan tergov jarayonida foydalanishga ruxsat bermadi.