Ўзбекистон мусулмонлари идораси ижтимоий тармоқларда Умра зиёратини амалга оширмоқчи бўлган мусулмонлар 14 кун кутишига доир талаб бекор қилингани тўғрисида тарқалган хабарларга муносабат билдирди.

Маълум қилинишича, Мусулмонлар идораси Ўзбекистоннинг Жидда шаҳрида жойлашган Бош консулхонасидаги Ҳаж ва Умра масалалари бўйича атташеси билан доимий мулоқот қилиб, ҳар бир жараённи диққат билан кузатиб бормоқда.

Саудия Арабистони Ҳаж ва Умра вазирлиги ширкати ишлари бош бошқармаси маълумотига кўра, подшоҳликда эпидемиологик вазият яхшиланаётгани, кунлик касалланиш 65 нафарга тушгани, вакцина қилинган аҳоли 60 фоиздан ошиши муносабати билан умра зиёрати учун ўрнатилган бир қатор чекловлар Саудия Арабистонида истиқомат қилаётган аҳоли ва подшоҳликда бўлиб турган чет эл фуқаролари учун юмшатилган.

Жумладан, 28 октябрь кунидан бошлаб, Ҳаж ва Умра вазирлигининг Иътамарна («Умра қилдик») мобил дастури орқали айни вақтда Саудия Арабистонида истиқомат қилаётган аҳоли ва подшоҳликда бўлиб турган четн эл фуқаролари учун ўрнатилган 14 кун ичида фақат бир маротаба умра амалини адо этиш чеклови олиб ташланган.

Аввалги тартиб бўйича Макка шаҳрида бўлиб турган фуқаро Масжид ал-Ҳаромга эҳром кийган ҳолда умранинг тавоф ва саъй амалини бир марта бажаргандан кейин, навбатдаги умра қилиши учун 14 кундан кейин рухсат берилар эди. Эндиликда янги қоидага кўра, Макка шаҳрида истиқомат қилаётган аҳоли ёки ушбу шаҳарда вақтинча яшаб турган хорижликлар бир неча бор умра амалини адо этишлари мумкин бўлади.

Ўзбекистон мусулмонлари идораси ҳаж ва умра сафарларга оид ўрганишларни давом эттирган ҳолда муборак сафарлар билан боғлиқ хабарларни расмий нашрларда эълон қилинишини маълум қилган.

Аввалроқ Саудия Арабистони ҳукумати чет элликлар кичик ҳаж — Умра зиёратини амалга ошириш учун 10 августдан қиролликка кириши мумкинлигини эълон қилган эди.

Эслатиб ўтамиз, бу йил Ҳаж зиёрати 17—22 июль кунлари амалга оширилди. Маккага бу йил 60 минг зиёратчи ташриф буюриши мумкин бўлди, аммо улар фақат қироллик фуқаролари ва у ерда яшовчи шахслардан иборат бўлди, чет элликлар эса пандемия туфайли иккинчи йил ҳам Ҳаж зиёратига қўйилмади. Зиёратчиларнинг барчаси 18—65 ёшда ва коронавирусга қарши эмланган бўлиши шарти қўйилди.

Саудия Арабистони 2020 йил октябрь ойидан бошлаб мамлакатда яшовчи аҳолиси учун Умра зиёратини амалга оширишга рухсат берган эди. Ва ўша ой ўрталарида мамлакат ҳукумати етти ой ичида биринчи марта Маккадаги Ал-Ҳаром масжидида намоз ўқилишига рухсат берди.