Tatariston Davlat kengashi (mamlakat parlamenti) respublikadagi prezident lavozimi nomini o‘zgartirishni nazarda tutuvchi qonun loyihasini qo‘llab-quvvatlashdan bosh tortdi, deb yozadi Meduza.
Hujjat Davlat Dumasiga sentabr oyi oxirida taqdim etilgandi. Unda Rossiya tarkibiga kiruvchi hududlardagi eng yuqori mansabdor shaxslar uchun umumiy nom — Rossiya Federatsiyasi subyektining rahbari nomini belgilash taklif qilinadi.
Tatariston Davlat kengashi qonun loyihasi qoidalarini “demokratik federal huquqiy davlat sifatida Rossiya Federatsiyasining konstitutsiyaviy tuzilishi asoslariga zid”, deb hisoblaydi.
Hujjatni qo‘llab-quvvatlamaslik to‘g‘risidagi qaror bir ovozdan qabul qilingan. Davlat kengashining Davlat qurilish va mahalliy o‘zini o‘zi boshqarish qo‘mitasi rahbari Albert Xabibullin Davlat Dumasidagi Tataristondan bo‘lgan deputatlarga respublika parlamenti pozitsiyasini qo‘llab-quvvatlashni, qonun loyihasining birinchi o‘qilishidan so‘ng esa uni yana muhokama qilishni taklif qilgan.
Tatariston Rossiya tarkibidagi uning rahbari prezident deb ataluvchi yagona hudud bo‘lib qolmoqda. Qolgan respublikalarda “rahbar” nomi qo‘llaniladi.
Federatsiya subyektlarining eng yuqori mansabdor shaxslari nomlarini birlashtirishni nazarda tutuvchi qonun loyihasi Davlat Dumasining Davlat qurilishi va qonunchilik qo‘mitasi raisi Pavel Krasheninnikov va Federatsiya kengashining konstitutsiyaviy qonunchilik va davlat qurilishi qo‘mitasi rahbari Andrey Klishas tomonidan taqdim etilgan. Xuddi shu hujjatda hudud rahbari lavozimligi uchun muddatlar soniga qo‘yilgan cheklovlarni olib tashlash taklif qilingan.
Izoh (0)