Erdo‘g‘on AQShni Afg‘oniston kabi Suriya va Iroqdan ham o‘z qo‘shinlarini olib chiqishga chaqirdi

Anqara AQSh qo‘shinlari Afg‘onistondan qanday olib chiqilgan bo‘lsa, Suriya va Iroqdan ham shunday olib chiqilishi kerak deb hisoblaydi. Bu haqda Turkiya prezidenti Rajab Toyyib Erdo‘g‘on CBS telekanaliga bergan intervyusida ma’lum qildi.

“Albatta, agar menda tanlash imkoni bo‘lsa, men ular Afg‘onistonni tark etganidek, Suriya va Iroqni ham tark etishini istagan bo‘lardim”, —  dedi Erdo‘g‘on. Uning so‘zlariga ko‘ra, agar tinchlikka intilayotgan bo‘lsa, Amerika harbiylarining bu mamlakatlarda qolishi mantiqsiz. “Biz bu xalqlarni, hukumatlarni o‘z holiga qo‘yishimiz mumkin, shunda ular o‘zlari qaror qabul qiladi”,  — dedi prezident.

Shu bilan birga, u Turkiya qo‘shinlari mamlakatni tiklash maqsadida Suriyada ekanini ta’kidladi. “Suriyada biz 100 ming uy-joy qurmoqdamiz. Odamlar, oilalar ko‘chirildi, vatanidan quvildi. Biz ular uchun uy quryapmiz. Boshqa mamlakatlar nima bilan bandligi menga qiziq. Buni tushunish juda muhim ”, — dedi Erdo‘g‘on.

Turkiya prezidenti Vashington, Moskva, Tehron va Anqara Suriya hamda Iroqda tinchlik o‘rnatish uchun birgalikda ishlashi mumkinligiga umid bildirdi. 29-sentabr kuni Sochida Rossiya prezidenti Vladimir Putin bilan o‘tkaziladigan uchrashuvda ushbu masalani muhokama qilmoqchimisiz, degan savolga Erdo‘g‘on: “Biz bu haqda Putin bilan gaplashyapmiz”, — deb javob berdi.

Shu hafta boshida Suriya Tashqi ishlar vaziri Faysal Mikdad Turkiyadan mamlakat shimoliy viloyatlaridagi harbiylarini olib chiqishni talab qildi. U, shuningdek, Anqarani Suriyadagi terrorchi guruhlarni qo‘llab-quvvatlashda aybladi.

AQSh 2003-yilda Saddam Husayn hukumatini ag‘darish uchun Iroqqa qo‘shin yuborgan. 2011-yilda harbiylar rasman mamlakatdan chiqarildi. Biroq 2014-yilda Barak Obama ma’muriyati Suriyadagi fuqarolar urushi va IShIDning kuchayishi fonida askarlarni qaytarishga qaror qildi.

2020-yil avgustda sobiq prezident Donald Tramp kontingentni 3,5 ming kishigacha kamaytirish niyatini ma’lum qildi. AP xabariga ko‘ra, shundan so‘ng harbiylar soni 2,5 ming kishigacha kamaygan. Iyul oyida agentlik xabar berishicha, Vashington va Bag‘dod yil oxirigacha AQSh qo‘shinlarini Iroqdan olib chiqilishiga kelishgan.

2018-yil dekabr oyida Tramp AQSh harbiylari Suriyani tark etishini e’lon qilgandi. U o‘z qarorini IShID jangarilarining asosiy qismi mag‘lub etilgani bilan izohladi. AQSh hukumati ma’lumotlariga ko‘ra, shu yilning iyul oyida Suriyada 900 ga yaqin amerikalik askar bor edi. Pentagon qo‘shinlarning olib ketilishiga hali erta edi, degan fikrni bildirdi, chunki IShID bilan kurash davom etmoqda. Amerika harbiylari “Suriya ichkarisidagi fuqarolar urushi bilan bog‘liq keng masalalardan boshqa ishlar bilan shug‘ullanmaydi”, degan edi idora vakili Jon Kirbi may oyida.