Insoniyatning koronavirus pandemiyasini yengib o‘tishga imkoniyati bor. Bu haqda Jahon sog‘liqni saqlash tashkiloti Tedros Gebreyesus ma’lum qildi, deb xabar beradi “RIA Novosti”.

“Pandemiya butun dunyo uni tugatishga qaror qilganida yakunlanadi. Bu bizning qo‘limizda”, — deydi JSST rahbari.

Gebreyesusning ma’lum qilishicha, insoniyatning virus ustidan g‘alaba qozonishga barcha imkoniyatlari mavjud. “Ammo dunyo ushbu vositalardan yaxshi foydalana olmadi”, — deya qo‘shimcha qiladi u.

Amaldor JSSTning maqsadini eslatib o‘tgan — 2021-yil oxiriga qadar har bir mamlakat aholisining kamida 40 foizini emlash. Gebreyesusning ta’kidlashicha, bunga mamlakatlar va vaksina yetkazib berishni nazorat qilayotgan kompaniyalarning bayonotlari ularning harakatlariga mos kelsa, erishish mumkin.

Tashkilot rahbari ushbu ko‘rsatkichga erishgan mamlakatlarni dori vositalarini  COVAX xalqaro mexanizmi doirasida ustuvorlik tartibida yetkazib berishga chaqirgan. Shu bilan birga, Gebreyesus pandemiyani tugatishda vaksinalarga nisbatan intellektual mulk huquqlarini to‘xtatish kerakligini qayd etgan.

So‘nggi ma’lumotlarga ko‘ra, butun dunyoda koronavirusga chalinganlar soni 242 million kishidan oshgan. Hozirga qadar infeksiya oqibatida 4,9 million odam vafot etgan.

Eslatib o‘tamiz, oktabr boshlarida BMT Bosh assambleyasining rahbari 2023-yilgacha dunyo aholisini COVID-19 ga qarshi emlashga erishish zarurligini aytgandi.