Turkiya janubida o‘rmonga o‘t qo‘yganlikda gumon qilinib, yetti nafar Rossiya fuqarosi qo‘lga olindi. Bu haqda Rossiyaning Antaliyadagi bosh konsulxonasiga tayanib, “TASS” xabar berdi.
Qayd etilishicha, rossiyalik sayyohlar guruhi 23-oktabr kuni Antaliya yaqinidagi Likiya so‘qmog‘i bo‘ylab harakatlanayotgan paytda qo‘lga olingan. Ular Chaglarja tumanidagi o‘rmonga o‘t qo‘yishda gumon qilinmoqda.
Shu kuni Rossiya Bosh konsulxonasi xodimi rossiyaliklarning hibsga olinishi sabablarini bilish uchun jandarm uchastkasiga tashrif buyurgan.
Sud majlisi 24-oktabr kuni bo‘lib o‘tdi. Advokatlarning arznomasiga qaramay, sud voqea tafsilotlari bo‘yicha tergovgacha bo‘lgan davrda rossiyalik sayyohlarni o‘rmonga beixtiyor o‘t qo‘yishda gumonlanuvchi sifatida hibsga olishga qaror qildi.
Baza Telegram kanali xabariga ko‘ra, qo‘lga olinganlar yong‘inni o‘zlari boshlamaganini, aksincha uni o‘chirishga harakat qilgani va favqulodda xizmatlarni chaqirganini ta’kidlamoqda.
Eslatib o‘tamiz, iyul oxiri—avgust boshida Turkiyada o‘rmon yong‘inlari avj oldi. Ular sababli jami 160 ming gektarga yaqin o‘rmon vayron bo‘ldi. Yong‘inlar Manavgatda 30 ming gektar, Bodrumda 12,6 ming gektar, Marmarisda 8 ming gektar va Antaliyadagi Guzelbog‘ atrofida 6,5 ming gektar o‘rmonlarga zarar yetkazdi.
Mahalliy OAV xabariga ko‘ra, “Olov bolalari” terrorchilik tashkiloti o‘rmon yong‘inlari uchun javobgarlikni o‘z zimmasiga olgan. Turkiya prezidenti Rajab Toyyib Erdo‘g‘on yong‘inlardan vayron bo‘lgan hududlarni tiklash uchun kishi boshiga uch tupdan ko‘chat ekishga va’da berdi.
Izoh (0)