Surxondaryo viloyati Jarqo‘rg‘on tumanida 10 tonna sarimsoq piyozni olib, pulini bermay ketgan fuqaroga jinoyat ishi qo‘zg‘atildi. Bu haqda viloyat IIB axborot xizmati xabar berdi.
Ma’lum qilinishicha, 8-sentabr kuni Toshkent shahrida yashovchi Z.Z. ismli fuqaro tuman IIBga ariza bilan murojaat qilgan. Uning so‘zlariga ko‘ra, 28-iyul kuni tumanning “Qoraburo” mahallasida yashovchi opasi, Z.Zaynabning uyida saqlab qo‘ygan 10,47 tonna sarimsoq piyoz mahsulotlarini Andijon viloyatida yashovchi K.Karim ismli shaxs 183,3 million so‘mga savdolashib olgan.
K.Karim pullarni mahsulotni sotganidan keyin berishini aytib, hozirgi kunga qadar pullarini bermasdan, o‘zlashtirib yuborgan.
Ta’kidlanishicha, holat yuzasidan 7-oktabr kuni K.Karimga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilgan
Avvalroq Samarqandda tadbirkorlarning qariyb 550 mln so‘m pulini o‘zlashtirgan shaxslar aniqlangani, Toshkent viloyatida firibgarlik uchun 5 marta sudlangan fuqaro yana shu jinoyat ustida qo‘lga tushgani to‘g‘risida xabar berilgandi.
Izoh (0)