O‘zbekistonda kam ta’minlangan oilalar bolalari uchun nafaqa va moddiy yordam tayinlash tartibi tasdiqlandi

Hukumat qarori bilan Kam ta’minlangan oilalarni “Ijtimoiy himoya yagona reyestri” axborot tizimi orqali aniqlash, ularga kam ta’minlangan oilalar bolalari uchun nafaqa va moddiy yordam tayinlash va to‘lash tartibi to‘g‘risidagi nizom tasdiqlandi, deb xabar beradi Telegram’dagi “Huquqiy axborot” kanali.

Nizomga ko‘ra, ishlovchi onalar yoki ularning o‘rnini bosuvchi shaxslar (budjet tashkilotlarida ishlaydigan onalar yoki ularning o‘rnini bosuvchi shaxslar bundan mustasno) bola 2 yoshga yetguncha uni parvarishlash uchun beriladigan har oylik nafaqani olish muddati tugaganidan so‘ng bolalar nafaqasini olishi mumkin.

Bolalar nafaqasi oiladagi bolalar sonidan kelib chiqib tayinlanadi. Bolalar nafaqasi 12 oy muddatga tayinlanadi, biroq oilaning eng kichik yoxud yagona bolasi tegishlicha 18 yoshga to‘lgan oyning oxirigacha to‘lanadi.

Moddiy yordam bola(bolalar)siz yoki barcha bolalari 18 yoshdan katta oilalarga va yakka-yolg‘iz fuqarolarga 6 oy muddatga tayinlanadi.

Oila

• 2021-yil 1-sentabrdan – oilaning har bir a’zosiga jami bir oylik o‘rtacha daromad 440 ming so‘mdan oshmaganda;
• 2022-yildan boshlab – oilaning har bir a’zosiga jami bir oylik o‘rtacha daromad minimal iste’mol xarajatlari miqdoridan oshmaganda kam ta’minlangan deb e’tirof etiladi.

Bolalar nafaqasi va moddiy yordam tegishli arizalarga asosan “Yagona reyestr” AT orqali kam ta’minlangan oila deb e’tirof etilgandan so‘ng tayinlanadi. Har bir oila tomonidan ariza topshirish va “Yagona reyestr” ATga kiritish bir oyda bir marta amalga oshiriladi.

Bolalar nafaqasi va moddiy yordam ariza beruvchi murojaat qilgan oydan keyingi oydan boshlab to‘lanadi.

Qarorga ko‘ra, 2022-yil martgacha jismoniy shaxslarning dala tomorqa yer maydonlari ro‘yxati shakllantirilib, tegishli ma’lumotlar “Ijtimoiy himoya yagona reyestri” axborot tizimiga taqdim etib boriladi.

Ma’lumot uchun, Prezident tomonidan imzolangan farmonga ko‘ra, 2021-yil 1-sentabrdan boshlab amalda bo‘lgan kam ta’minlangan oilalarga 14 yoshgacha bolalari uchun nafaqa va 2 yoshgacha bolani parvarish qilish nafaqasi o‘rniga yagona bolalar nafaqasi joriy etilgan.

Bundan avval Qashqadaryoda muhtoj, boquvchisini yo‘qotgan, kam ta’minlangan va nogironligi bo‘lgan oilalarga 1 milliard 158 million so‘m ajratilgani, O‘zbekistondagi vasiylik, homiylik va patronatga olingan bolalarga 18 yoshga to‘lguniga qadar mahalliy budjetdan 1,2 million so‘mdan to‘lanishi hamda O‘zbekistonda avgust oyida “temir daftar”dagi oilalarning 18 yoshgacha bo‘lgan farzandlariga 500 ming so‘mdan berilishi haqida xabar berilgandi.