Navoiy viloyatida tarkibida oltin zarralari bo‘lgan tosh-qumlarni noqonuniy qazib olish bilan shug‘ullangani uchun qo‘lga olingan shaxs IIB xodimiga pora berishga urindi. Bu haqda viloyat IIB axborot xizmati xabar berdi.
Ma’lum qilinishicha, M.B. ismli uchquduqlik fuqaro ko‘p bora ogohlantirilishiga qaramasdan, qonunga zid ravishda tarkibida oltin zarrachalari bo‘lgan tosh-qumlarni qazish faoliyati bilan shug‘ullangan. Mazkur fuqaroning noqonuniy qilmishi Zarafshon shahar Ichki ishlar bo‘limi Jinoyat qidiruv bo‘limi xodimlari hamda YHXB xodimlari tomonidan o‘tkazilgan tezkor reyd tadbiri davomida fosh etilgan.
Zarafshon shahar yo‘l-patrul xizmati maskanida fuqaro M.B. boshqaruvidagi Nexia rusumli avtomashina to‘xtatib tekshirilgan va mashinadagi 12 dona qopga solingan, tarkibida oltin zarrachalari bo‘lgan toshlar tegishli tartibda rasmiylashtirib olingan.
Shundan so‘ng fuqaro M.B o‘z aybini yashirish hamda toshlarni qayta qo‘lga kiritish maqsadida Zarafshon shahar Ichki ishlar bo‘limi JQB xodimiga 300 AQSh dollari evaziga to‘plangan hujjatlarni yo‘q qilish, sudga chiqarmaslik hamda unga qonuniy chora ko‘rmaslikni taklif qilgan. Xodim tomonidan fuqaroning bu harakati qonunga zid ekani bir necha bor aytilishiga qaramasdan, fuqaro tomonidan pora taklif etilgan.
Tezkor xodimning arizasiga ko‘ra, o‘tkazilgan tadbir davomida Ichki ishlar vazirligi Shaxsiy xavfsizlik bosh boshqarmasi Navoiy viloyati bo‘yicha bo‘limi xodimlari tomonidan fuqaro M.B. jinoyat qidiruv xodimiga 300 dollar miqdoridagi pullarni berayotgan vaqtida daliliy ashyolar bilan qo‘lga olingan.
Hozirda mazkur holat yuzasidan Jinoyat kodeksining 211-moddasi (pora berish) tegishli bandi bilan jinoyat ishi qo‘zg‘atilib, dastlabki tergov harakatlari olib borilmoqda.
Avvalroq Jizzaxda oltin rudasini noqonuniy ravishda qazib olishga uringan to‘rt kishini tosh bosib qolgani, Navoiyda qimmatbaho metallarga ega 5 ta yer uchastkasi sotuvga qo‘yilgani to‘g‘risida xabar berilgandi.
Izoh (0)