Oliy Majlis Senati adliya vaziri bilan debatga sabab bo‘lgan qonunning rad etilishiga rasmiy munosabat bildirdi

Oliy Majlis Senati yigirmanchi yalpi majlisida muhokama qilingan “Ijtimoiy tadbirkorlik to‘g‘risida”gi qonun va uning senatorlar tomonidan rad etilishi ayrim ijtimoiy tarmoqlarda turli fikrlarni keltirib chiqarayotgani yuzasidan rasmiy munosabat bildirdi.

Senatning yigirmanchi yalpi majlisida senatorlar “Ijtimoiy tadbirkorlik to‘g‘risida”gi qonunning ba’zi normalarini qayta ko‘rib chiqish kerak deb hisoblab, uni qaytargan edi. Adliya vaziri Ruslanbek Davletov senatorlarning qonunni qabul qilishga qarshi bildirgan har bir argumentini rad etib, ayrim siyosatchilar “xalqdan kelib chiqayotgan yangi g‘oyalarni tushunmasligini” ta’kidlagandi. Oqibatda Senat raisi uzoq davom etgan debatga aralashishga va tomonlarni tinchlantirishga majbur bo‘lgandi.

Munosabatda qayd etilishicha, senatorlar muhokamaga qo‘yilgan barcha qonunlarni shunchaki ko‘r-ko‘rona ma’qullab yuboravermaydi, har bir hujjat yalpi majlisgacha juda ko‘p chig‘iriqlardan o‘tadi. Ekspertlar kengashi jalb qilinib, dastlabki tarzda qo‘mitalarda ko‘rib chiqiladi. Qonun tashabbuskorlari ham bu jarayonda bevosita ishtirok etadi. Qolaversa, xalq vakillari joyiga chiqqan holda mavjud holatni o‘rganadi. Ana shulardan keyingina rad etishga to‘la ishonch hosil qilinsa, qonun qaytariladi.

Ta’kidlanishicha, ba’zi ijtimoiy tarmoqlar foydalanuvchilari mana shu holatlarni atroflicha hisobga olmagan holda, bir yoqlama qarash orqali senatorlarni ijtimoiy tadbirkorlik nimaligini tushunmaslikda ayblashi, “shekilli”, “shunaqaga o‘xshaydi” degan taxminiy xulosalar bilan ular faoliyatiga baho berishi — bu professionallarga xos bo‘lmagan yondashuv hisoblanadi. “Chunki parlament yuqori palatasi a’zolari turli sohalarni, huquqiy, ijtimoiy-siyosiy, iqtisodiy jarayonlarni yaxshi biladigan yetuk, malakali mutaxassislardir. Shu bois tashqaridan turib, qonunning mazmun-mohiyatidan yaxshi xabardor bo‘lmagan holda baho berish, shaxsiyatga yo‘naltirilgan fikrlarni aytish axloqiy va huquqiy jihatdan ham to‘g‘ri emas”, — deya qayd etiladi xabarda.

O‘z navbatida, Oliy Majlis Senati ijtimoiy himoyaga qarshi degan fikrga borilmaslik so‘ralgan:

Ma’lum qilinishicha, tez orada Tadbirkorlik kodeksi qabul qilinadi, barcha tadbirkorlar bitta, yagona qonun asosida ish olib boradi — ana shunda ko‘pgina masalalar yana o‘z yechimini topadi.

“Umuman aytganda, rad etilgan qonun yana ko‘rib chiqiladi. Maromiga yetgach, Oliy Majlis Senatining navbatdagi yalpi majlisida muhokama qilinadi. U qo‘llab-quvvatlansa, ma’qullanadi. Shu bois jurnalist va blogerlardan ortiqcha his-hayajonga berilmay, vaziyatni to‘g‘ri baholab, xolis munosabat bildirishlarini so‘rab qolamiz. Agar ular ‘Ijtimoiy tadbirkorlik to‘g‘risida’gi qonunni qayta ishlash jarayonida bevosita qatnashishni istasalar, marhamat, Senat bu borada ham ularga imkoniyat yaratib berishga tayyor”, — deyiladi munosabatda.

Avvalroq O‘zbekiston Nogironlar jamiyati raisi, Karlar jamiyati raisi va Ko‘zi ojizlar jamiyati raisi senatorlar tomonidan “Ijtimoiy tadbirkorlik to‘g‘risida”gi qonunning qaytarilishi yuzasidan murojaat bilan chiqqandi. Murojaatda ta’kidlanishicha, senatorlar qonunni rad etgani “boshqalar bilan erkin raqobatlasha olmaydigan imkoniyati tabiatan cheklangan shaxslar uchun juda kutilmagan holat bo‘lgan”.