Қозоғистоннинг биринчи президенти Нурсултон Назарбоев умуртқасини операция қилдиргани давлат раҳбари лавозимидан кетишининг сабабларидан бири эканини тан олди, дея хабар тарқатган «Интерфакс».
«Аввал бу ҳақда умуман гапирмаганман, бу ўзига хос шовшувли янгилик бўлади. Мен умуртқамни, белимни операция қилдирганман ва жарроҳлик амалиёти анча жиддий эди», — дея ҳикоя қилган Назарбоев «Хабар» телеканалида 21 октябрь куни эфирга берилган «Портретга чизгилар» ҳужжатли фильмида.
«Касалманд президент давлат раҳбари бўла олмайди. Мамлакат сенинг аҳволинг туфайли азият чекмаслиги керак. Соғлиғингда муаммолар бор пайтда 350 та учрашув ўтказиш, сафарларни давом эттириш мумкинми? Бу ҳам давлат раҳбари сифатида истеъфо беришимда муҳим аҳамиятга эга бўлди. Мен ҳеч қачон бу ҳақда аввал гапирмаган эдим, ушбу ишим учун ҳаммадан кечирим сўрайман», — деган Қозоғистон халқининг етакчиси.
Назарбоев соғлиғи билан боғлиқ муаммолар катта оммавий тадбир вақтида 2011 йилда кузатила бошлагани ҳақида ҳам гапирган.
«8 март куни биз концертда бўлдик, томоша тугагач ўрнимдан турдим, шу вақтда оёғим ерга ёпишиб қолгандек қимирлай демасди. Қўриқлаш хизматининг зобитини чақирдим ва ёнимда мени қўлтиқлаб юришини сўрадим, мен унга: кел одамлар сезиб қолмасликлари учун жуда секин ҳаракат қиламиз деб айтдим. Зал тўла эди. Вазиятдан шундай қилиб чиқиб кетганмиз. Кейин шифокорлар бу нима эканини текшира бошлашди, менда умуртқа муаммолари бошланганди», — деган у.
«Буни халққа қандай тушунтириш мумкин? Ҳали қилинадиган ишлар кўп, кетишнинг вақти эмасди. Кетишга тайёр эмасдим ҳам. Сабаби меросхўр борасидаги масала ҳал этилмаган ва бошқа муаммолар ҳам бор эди. Кейинчалик бу борадаги қароримни ўзгартирдим. Орадан икки йилдан ошиқ вақт ўтди, президентликдан истеъфо бериб тўғри қарор қабул қилганман деб ҳисоблайман, афсусда эмасман», — дейди Назарбоев.
Шунингдек, Қозоғистоннинг биринчи президенти концерт залида кузатилган ҳолатдан аввал ҳеч ҳам касал бўлмаганини қўшимча қилган.
Мавзуга доир:
Изоҳ (0)