“O‘zbekneftgaz” AJ boshqaruvi raisi Mehriddin Abdullayev va Qashqadaryo viloyati hokimining investitsiyalar va tashqi savdo bo‘yicha o‘rinbosari Bahrom Yusupov “Sho‘rtan gaz-kimyo majmuasi” MChJning Qarshi shahrida joylashgan Qarshi termoplast ishlab chiqarish obyektida bo‘lib, bu yerda ishlab chiqarilayotgan mahsulotlar nomenklaturasi va ishlab chiqarish sharoitlari bilan tanishdi.
Qarshi termoplast 2006-yilda tashkil etilgan bo‘lib, yiliga 5 ming tonna polietilen mahsulotini qayta ishlab, qishloq xo‘jaligi uchun zarur bo‘lgan sug‘orish qurilmalari va ular uchun zarur bo‘lgan butlovchi qismlarni ishlab chiqarishga ixtisoslashgan korxonadir.
Qarshi termoplast tomonidan ishlab chiqarilayotgan 12 turdagi mahsulotlar “O‘zbekneftgaz” AJning mahalliylashtirish dasturiga kiritilgan bo‘lib, 2020-yilda dastur doirasida 70 milliard so‘mga yaqin mahsulot ishlab chiqarilgan.
Tashrif davomida boshqaruv raisi qishloq va suv xo‘jaligi sohasida suvni iqtisod qilishga mo‘ljallangan yangi turdagi tomchilab sug‘orish tizimlarini ishlab chiqarish bilan bog‘liq masalalarga alohida to‘xtalib, bunday mahsulotlar ishlab chiqarish hajmini oshirish hamda joriy qilish maydonini yiliga 10 ming gektardan ko‘paytirish kerakligi zarurligini ta’kidladi.
Ishlab chiqarilayotgan suv quvurlari bilan bir qatorda, gaz sohasida qo‘llash mumkin bo‘ladigan polimer quvurlar va bog‘lovchi detallar ishlab chiqarishni joriy qilish bo‘yicha taklif berildi.
Ta’kidlash kerakki, joriy yilning 9 oyida 60 milliard so‘mlik mahsulot ishlab chiqarilib, yil yakuniga qadar mahsulot ishlab chiqarish hajmini 80 milliard so‘mga yetkazish rejalashtirilgan.
Qarshi termoplast ishlab chiqarish bazasiga Xitoy Xalq Respublikasining Qingdao Xindacheng Plastic Machinery Co., Ltd. kompaniyasi tomonidan umumiy qiymati 470,2 ming dollarlik tomchilatib sug‘orish tizimining polimer qismlarini ishlab chiqarish liniyasi o‘rnatilgan.
Hozirgi kunda “Sho‘rtan gaz kimyo majmuasi” MChJ O‘zbekiston Respublikasi Suv xo‘jaligi vazirligi bilan hamkorlikda, Qarshi termoplast tomonidan ishlab chiqarilayotgan mahsulotlarni respublikadagi qishloq xo‘jaligi mahsulotlari yetishtiruvchilariga tomchilatib sug‘orish tizimini yetkazib berish va uning imkoniyatlaridan kengroq foydalanish bo‘yicha amaliy ishlarni olib bormoqda.
Tashrif davomida “O‘zbekneftgaz” AJ boshqaruvi raisi loyiha doirasida ishlab chiqarilayotgan mahsulotlarni ko‘zdan kechirib, ushbu faoliyat turini yanada kengaytirish bo‘yicha topshiriqlar berdi. Xususan, polimer mahsulotidan turli markadagi burg‘ilash va gaz o‘tkazish quvurlari, yangi turdagi kompozit panellarni ishlab chiqarishni tashkil etish bo‘yicha vazifalar belgilab berildi.
“O‘zbekneftgaz” AJ matbuot xizmati
Izoh (0)