Oliy Majlis Senatining yigirmanchi yalpi majlisida Bojxona kodeksining 81 ta moddasiga o‘zgartirish va qo‘shimchalar kiritish to‘g‘risidagi qonun senatorlar tomonidan ma’qullandi. Bu haqda parlament yuqori palatasi matbuot xizmati xabar berdi.
Ta’kidlanishicha, mazkur qonun keyingi 2 yil ichida tadbirkorlar tomonidan ko‘tarilayotgan muammolarning yechimiga qaratilgan. Unga ko‘ra, quyidagi yangiliklar joriy etiladi:
- Bojxona hujjatlarining rasmiylashtirish muddati 3 kundan bir kungacha qisqarmoqda;
- Tovar va transport vositalarini bojxona rejimiga joylashtirish bekor qilinyapti;
- Qayta ishlash natijasida hosil bo‘lgan tovarlarni bojxonadan chiqarish vakolatli shaxslar tomonidan amalga oshirilishi yo‘lga qo‘yiladi (avval bojxona o‘zi istagan narxni qo‘yib, tadbirkorlar manfaati inobatga olinmas edi);
- Bojxona tizimiga vakolatli iqtisodiy operator instituti joriy etilmoqda (bu bojxonadagi hisob-kitoblarda inson omilining aralashuvini cheklaydi);
- Endilikda nafaqat aeroportlar, balki mamlakatning tarixiy shaharlari Samarqand, Buxoro, Xorazm, Qo‘qon markazlarida bojsiz savdo qiluvchi Duty Free do‘konlari tashkil etiladi.
Bundan tashqari, tizimda appelyatsiya kengashi tashkil etilmoqda. U shu kunga qadar tadbirkor bilan bojxona o‘rtasidagi mavjud nizolarni sudgacha hal qiladi hamda ortiqcha ovoragarchiliklarning oldi olinadi. Shu kabi 80 ga yaqin o‘zgarishlar ushbu qonunda o‘z aksini topgan.
Eslatib o‘tamiz, 2020-yilda O‘zbekistondagi Duty Free do‘konlarini boshqaruvchi Central Asia Megastar MChJ kompaniyasi xususiylashtiriladigan kompaniyalar ro‘yxatiga tushgandi. Duty Free 2018-yilda 74,2 milliard so‘m daromad, shundan 31,3 milliard so‘m sof foyda olgan. 2019-yilda esa bu ko‘rsatkich mos ravishda 87,4 milliard va 23,7 milliard so‘mni tashkil qilgan.
Izoh (0)