Saylovlar yaqinlashgani sari ayrim kuchlar, xususan, qo‘shtirnoq ichidagi muxolifatchilar tomonidan aholiga buzg‘unchi g‘oyalarni singdirish, jamiyat a’zolarining ongiga ruhiy ta’sir ko‘rsatish jadallashadi. “Demokratik” qadriyatlar niqobi ostida tinchlikni buzishga, hokimiyatni bosib olishga ochiqdan-ochiq da’vat etish kuzatilayotgani xavotirga solmasdan qolmaydi. Afsuski, bunday targ‘ibotchilarning asosiy maqsadi xalqqa ko‘maklashish emas, balki jamiyat farovonligiga putur yetkazish, hokimiyatni egallash hisoblanadi.
Yaqin Sharqda avj olgan “Arab bahori” kabi voqealarning asosiy maqsadi nima ekanligi oradan yillar o‘tib isbotlandi. Avvalombor, bu “inqilob”lar na iqtisodiyot va insonlar hayotining yaxshilanishiga, na korrupsiyaning oldini olishga, na huquq ustuvorligiga olib keldi. “Arab bahori” qochoqlar sonining qariyb 9 baravar oshishiga sabab bo‘ldi, mamlakatlarni terrorizm xavfi eng yuqori bo‘lgan 20 davlat qatoriga olib kirdi.
Bundan tashqari, ayrim “inqiloblar” ortida xorijiy kuchlarning borligi bu kabi harakatlar mamlakatda erkinlik o‘rniga qaramlik ruhini shakllanishiga olib kelishini anglatadi. Demak, buzg‘unchi g‘oyalarga berilmaslik, “inqilob” holatlariga yo‘l qo‘ymaslik uchun ogoh bo‘lish zarur.
Bir tarixchi aytganidek, “tarix ustoz emas, balki nazoratchidir: bizni hech narsaga o‘rgatmaydi, lekin bilmaganligimiz uchun qattiq jazolaydi”.
Shohjahon Xo‘jayev, Toshkent davlat yuridik universiteti kafedra mudiri
Izoh (0)