Andijon viloyati Paxtaobod tumanida tez yordam shifokoriga og‘ir tan jarohati yetkazgan fuqaroga jinoyat ishi qo‘zg‘atildi. Bu haqda Sog‘liqni saqlash vazirligi matbuot xizmati xabar berdi.
Qayd etilishicha, bemorning mast qarindoshi tez yordam shifokorini do‘pposlab, unga jiddiy tan jarohati yetkazgani haqida xabar ijtimoiy tarmoqlarda tarqaldi. Mazkur holat Sog‘liqni saqlash vazirligi tomonidan nazoratga olinib, zudlik bilan mavjud vaziyatga aniqlik kiritish maqsadida o‘rganishlar olib borildi.
Aniqlanishicha, 17-oktabr kuni soat 00:30 larda Paxtaobod tez tibbiy yordam bo‘limi Madaniyat shoxobchasi dispetcher xizmatiga shu tumanning “Ma’rifat” mahallasidan kelib tushgan murojaatga ko‘ra, darhol navbatchi shifokor N.A. boshchiligidagi tez yordam brigadasi yuborilgan. Biroq chaqiruv bo‘lgan xonadon egasi 1991-yilda tug‘ilgan fuqaro B.T. shifokorlarning yetib borishini kutmay, bemor onasi G.U.ni o‘z shaxsiy mashinasida tez yordam shoxobchasiga olib kelgan.
O‘sha kuni tuman tez tibbiy yordam bo‘limi Madaniyat shoxobchasida navbatchilik qilayotgan boshqa bir shifokor 1994-yilda tug‘ilgan Sh.Z. darhol bemor G.U.ning qon bosimi, yurak urishini o‘lchab, unga kerakli tibbiy yordam ko‘rsatgan. O‘z vaqtidagi muolajalar sababli bemor G.U.ning qon bosimi me’yorlashib, umumiy holati yaxshilangan.
Ammo fuqaro B.T. onasiga ko‘rsatilayotgan tibbiy yordamdan qoniqmasdan, jamoat joyi hisoblangan tez yordam binosida jamiyatda yurish-turish qoidalarini qasddan mensimasdan shifokorlarni uyatli so‘zlar bilan haqorat qiladi va o‘z xizmat vazifasini o‘tayotgan yana bir shifokor erkak — M. D.ning yoqasidan olib, uni bo‘g‘a boshlagan. Shu payt hamkasbini ajratish uchun borgan Sh.Z.ning harakatlari B.T.ga yoqmaydi va u shifokorning yuziga musht tushirgan. Bunga qanoat qilmagan B.T. musht zarbidan yerga yiqilgan Sh.Z.ning yuzi va tanasining turli joylariga urib, unga jiddiy jarohat yetkazgan.
Shundan so‘ng shifokor olgan tan jarohatlari bilan Andijon davlat tibbiyot instituti klinikasiga yotqizilgan. O‘tkazilgan sud-tibbiy ekspertizasi davomida Sh. Z.ga bosh miya chayqalishi, burun suyagining sinishi, ikkala ko‘z qovoqlari va burun sohasidagi qontalash tashxisi qo‘yilgan.
Xabarda aytilishicha, ushbu holat yuzasidan tuman ichki ishlar bo‘limi tomonidan tergovga qadar tekshiruv harakatlari olib borilib, Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atildi va tibbiyot xodimiga tajovuz qilgan B.T.ga nisbatan qamoqqa olish ehtiyot chorasi qo‘llanildi.
Eslatib o‘tamiz, shu yilning mart oyining boshlarida Jizzaxda chaqiruv bo‘yicha yetib kelgan shifokor xonadon egasining o‘g‘li tomonidan kaltaklangandi. O‘sha oyning oxirlarida Toshkentda mast erkak shifokor ayolni kaltaklab, jiddiy jarohat yetkazgandi. Iyul oyida esa Samarqandda fuqaro farzandini davolashga kelmagan navbatchi shifokorlarni kaltaklagandi.
Izoh (0)